Wojsko chce inwigilować myńszości

RMF FM informuje, iże wojsko zbiyrŏ prywatne informacyje ô polskich ôbywatelach nŏrodowości inkszyj ôd polskij. Pismo we tyj sprawie dostało pŏrudziesiyńciu starostōw ze zachodnij i połedniowo-zachodnij Polski.

Dokumynt prosi ô informacyje ô liczbie ôsōb, co deklarujōm inkszõ nŏrodowość, jejich zintegrowaniu ze resztōm społeczyństwa, poziōmie żywobiyciŏ, nojsrogszych problymōw i kōnfliktōw, co trefiajōm sie we jejich miyjscu zamiyszkaniŏ. Armijŏ chce tyż informacyji ô formalnych i niyformalnych liderach ôrganizacyji ôsōb, co przinŏleżōm do inszych ôd polskij grup etnicznych.

Zbiyrane sōm tyż informacyje ô lokalnych mediach i jejich podatności na rozmajte wpływy.

Pismŏ dŏwŏ lokalnym regyrōnkōm czas do września na sebranie i przekŏzanie informacyji do WKU.

Dalszŏ tajla artykułu niżyj

– Sytuacyjŏ myńszości nŏrodowych i etnicznych winna być mōnitorowanŏ ôd władz po to, żeby dŏwać pozōr na potrzeby ôbywatelōw i miyszkańcōw Republiki. Do takigo mōnitorowaniŏ powołane sōm syjmowe kōmisyje abo spōlne kōmisyje regyrōnku i myńszości. W przipadku zbiyraniŏ danych ôd wojska niy rozchodzi sie ale ô dialog, ino ô inwigilacyjŏ – padŏ Jorg Gorzelik, szef Ruchu Autōnōmije Ślōnska.

Podle Sztabu Gyneralnego zbiyranie informacyji do analiz mŏ ino naturã statystycznõ, wielościowõ i jakościowõ i starŏ sie ô zachowanie danych prywatnych. Proszynie ale ô informacyje ô kōnkretnych ôsobach, co sōm za niyformalnych liderōw, a tyż ô podatności mediōw lokalnych na cudze wpływy tymu przeczōm.

– Ôsoby nŏrodowości niypolskij widzi sie za potyncjalne zagrożynie. Skazowanie formalnych i niyformalnych liderōw mŏ we tyj sytuacyji być formōm dōnosu. Mōm nadziejã, iże starostōm niy braknie ôpowŏgi, żeby przeciwstawić sie tym totalitarnym pōmysłōm – dodŏwŏ Gorzelik.