Woda w kotle zewrała… Stadiōn Ślōnski przijōn kadrowiczōw – 15.10.2018 [Ślōnski fusbal, film]
Szpil Polski ze Słowacjōm 14 paździyrnika 2009 bōł chłōdnym pożegnaniym ze Stadiōnym Ślōnskim. Jedynōm bramōm bōło wtedy samobōjcze (chocioż spektakularne) trefiyni polskigo ôbrōńcy. Na żywo widziało to wiyncyj szpecōw ôd ôdgarnianio śniega niż istnych kibicōw. Dalij już wiymy co sie na Ślōnskim pochało. Momyntami zdało sie, że keta z kłōdkōm z bramy stadiōnowej już sie niy straci. Na szczynści wtedy ftoś mōndry projekty posadziynio na murawie zimiokow czy sprzedanio aryny sōmsiednimu zoo pod wypas surykatek wyciepoł do hasioka. Inwestycjo przepłacōno, ale dyć niy taki piniōndze w tym kraju wyciepuje sie w maras. To trza było dokludzić do kōńca do telkich mōmyntōw jak tera…
W Kotle Czarownic (czy jak fto woli – Heksōw) w czwortek a niedziela zaś było gorko jak za piyrwyj. Po 9-ciu latach mōmy szpil ô punkty. Tym razym śniyg niy suł a stadiōn bōł fol (poza sektorym przikrytym plałōm #EqualGame w ramach sztrofy za rasistowski prziśpiywki Polokōw w Bolōnii). W kożdym razie – poezjo. Porzōndny kōmyntator szportowy pojechołby sam jakōm epnōm metaforōm. Tōż voilà: heksōm woda w kotle zewrała, yno kluzek ni mioł fto powciepować. Coś w tym je, dyć kibice na szpilach Polski z Portugaliōm i Italiōm zrobiyli swoji a wracali du dōm głodni porzōndnego fusbalu. Wiela go niy widzieli, szczegōlnie w wykōnaniu Polskij kadry.
Ôdnotować musza ślōnski akcynciki. To Arek Milik i Kamil Glik. Tyn drugi klupnōł nawet brama z Portugaliōm. Ok, mono i samobōjczo, ale Rafa Silva musioł sie zdziwić, że to niy ôn wraziōł bala do neca, chocioż widzioł już yno pusto brama. Panie Kamilu niy gorszcie sie… Bydzie lepij. Heksy wyboczōm…
Dalszŏ tajla artykułu niżyj
Grzegorz Buchalik – etnolog, historyk, felietōnista, fusbalista. Kludzi bloga Ślōnski Fusbal:
https://www.facebook.com/SlonskiFusbal/