We Żorach ślōnsko godka mo sie dobrze

Tela sie godo ô naszej slōnski godce, ale czy godani coś zmiyni, jak my sami niy bydymy dbać ô to dziedzictwo naszych starzikōw? We Żorach jak nikaj dbajōm ô to, żeby ta godka sie niy straciła.

28 marca we Miejskim Dōmu Kultury /MOK / miało miejsce ważne wydarzyni, mianowicie Gala Pokōnkursowo Projektu „Chcę znać swoje dziedzictwo”.

We ôbecności włodarzy miasta Żory i zaproszōnych gości Gala ta ôtworzyły „Małe Rojanki” pieśniczkōm „Zamiatała Andzia”. Wyszło im to fest piyknie za co ôtrzimały wielki brawa.

Jednako nojważniejszym punktym tego trefu były wystympy przedszkolakōw i szkolorzy miejscowych szkōł. We tyn dziyń na scynie królowały ślōnski pieśniczki i prziśpiywki, a godka ślōnsko we wykōnaniu szkolorzy i przedszkolakōw. Młode pokolyni pokozało, że majōm we zocy niy yno godka ale i downe zwyczaje.

Patrōnat nad tym projektym ôbjōn prezidynt miasta Źory p.Waldemar Socha oraz Przewodniczōncy Rady Miasta p. Piotr Kosztyła. Cołki projekt nadzorowała p. Jadwiga Tabor ze Cyntrum Edukacji Regiōnalnej w Żorach.

To s ôkazje 23 lot geburstaku  CER na rynce p. Jadwigi Tabor ôstoł wryncziny piykny pukiet kwiotkōw. Pani Jadwiga Tabor bez 23 lata prōmuje regiōnalizm, folklor i pszoci do naszej małej ôjczyzny. Co tu dużo godać: dziynki takim ôsobōm CER działo prynżnie we żorskim środowisku i niy yno.

Sama Gala wyszła piyknie, bo wystympujący szkolorze, szkolorki i przedszkolacy robili wszystko, żeby  pokozać sie s najlepszej strōny. I to sie chwoli, bo przeca jak by nie było takich nastympcōw, to nasza godka umrze – jak to padajōm – śmierciōm naturalnōm.

I tu trza podziynkować niy yno ôrganizatorōm, wystympujōncym ale i ôjcōm dziecek, kierzi pōmogali im sie przigotować do wystympu. Jak widać slōnsko godka i śpiywani we Żorach majōm sie dobrze.

R. Sobik

Więcej o nagrodzonych na str  https://www.facebook.com/CentrumEdukacjiRegionalnejZory  w temacie „CHCĘ ZNAĆ SWOJE DZIEDZICTWO” 2023

foto 1, 2 ,3 CER i własne