Sprŏwca fałszywego alarmu chycōny

Policyjōny z Kōmyndy Krysowyj Policyje w Lublińcu chyciyli chopa, co zgłosiōł podłożynie ladunku wybuchowego na terynie jednego z lublinieckich lazarytōw. Krōtki czas ôd powiadōmiyniŏ do chycyniŏ sprawiōł, iże niy było decyzyje ô ewakuacyji pacjyntōw placōwki. Ôpity 31-latek trefiōł do policyjnego heresztu.

W niydzielã przed pōłnocōm dinst lublinieckij kōmyndy przijōn zgłoszynie ô szterowaniu ciszy nocnyj ôd ôpitego chopa, co go niy przijōn do lazaryt. Po dojechaniu na plac patrolu, pracownik placōwki poinformowoł policyjōnōw, co chwilã wczaśnij chop wyszoł z terynu lazarytu i ôddalōł sie w niyznōmym rychtōnku. W czasie jak mōndurowi szukali breweryjŏrza, dinst kōmyndy przijōn zgłoszynie ô podłożyniu na terynie lazarytu ladunku wybuchowego. Ô sytuacyji zarŏz uwiadōmiōne były ôdpowiednie dinsty, a na plac przibyły 3 zastympy fojerwery. Na szczyńście bez pŏrãnŏście minut szandarzi namiyrzyli i chyciyli sprŏwcy alarmu, co nim sie pokŏzoł tyn sōm niy przijynty wczaśnij ôżarty pacjynt. Chop bōł zastawiōny i trefiōł do policyjnego heresztu. Po wytrzyźwiyniu bydzie ôdpytany i usłyszy ôbskarżynie, a ô jego dalszym losie uzdŏ prokuratōr. Drabkŏ reakcyjŏ dinstōw i chyciynie sprŏwcy, jak sie pokŏzało fałszywego alarmu sprŏwiyły, co niy trzeba było uzdŏwać ewakuacyji. Sprŏwcy schwŏlnego zgłoszyniŏ grozi terŏz 8 lŏt wiynziyniŏ.

Fotografijŏ na wiyrchu: KPP Lubliniec