Słowo na niedzielę: Gupszy ryczy głośniej jak mōndry. Ô welōnku

Dzisiej chciołech sie z Wami podzielić mojōm małōm refleksyjōm, kerŏ prziszła mi na myśl, kej słuchołech jednyj z ksiōnżek niy żyjōncego już fizyka Stephena Hawkinga. Telã razy we historyje ktoś mōndry wynajdowoł nowŏ teoryjŏ naukowŏ a ludzie miast tyj perzony wysłuchać, czynściyj sie z niyj lachali, bo sie im zdŏwało, iże sōm ôd niyj szprytniejsze.

Dalszŏ tajla artykułu niżyj

Zdŏ mi sie, możno sie ôchybiã, iże nŏjczynściyj wadzōm sie ludzie, kerzi majōm niskŏ samoocyna. Ôni muszōm pokŏzać kery sam mŏ recht. Nawet kej niy majōm. A potym majōm sie w zocy, przeca wygrali wojna ô nŏjważniejszŏ rzecz pod Słōńcem. Czasym pewniykiym sōm tak robiã.

Takie swarzynie kosztuje wielã enegije, je sztresujōnce a niy sōm my ôd tygo zdrowsze. Za fest sie spiyrōmy ô sprawy mało wŏżne. Mōno mōmy za mało wiedzy? Możno we rychtyk wŏżnych kwestiach niy poradzymy sie zbywać? Ekszpertōw ôd tygo jak mŏ być je fol. A durś je jako widzicie. Po mojymu trza nōm echt wissynszaftlyrōw.

Gynau widzã ta cecha postrzōd politykōw a ich zwolynnikōw. Co rŏz muszōm kogoś wyryczeć a wyklackać. Yno skuli tygo co chop abo baba je z inkszyj partje abo mŏ inksze zdanie. Niy słuchajōm co sie do nich gŏdŏ. Nale gŏdać to kŏżdy z nich chce. Gowa może ôd tygo rozboleć. Tak sie myślã, niy ma żech omnibusym, nale zdŏwŏ mie sie, co Świat bydzie wtedy lepszy, kej chociŏż my bydziemy inksi. A tygo sobie a Wōm winszujã.

Bartłomiej Bobula – Wieloletni aktywista. Twórca i organizator Śląskiego Kącika Literackiego, Śląskiego Dnia Dziecka i Śląskiego Mikołaja. Prekursor zmian w ustawie metropolitalnej. Działał na rzecz transportu publicznego i infrastruktury. Organizator konferencji. Felietonista i bloger w Ethno.OMG.