Skoczōw: Porwane auto i dziesiyńć lŏt we hereszcie
Szandarzi ze Skoczowa zastawiyli po pościgu chopa, co jeździōł porwanym autym. 34-latek do tego przewoziōł z aucie rzeczy, co je przōdzij wczaśnij ukrŏd z jednego z dōmōw w Ôgrodzōnyj. Chop trefiōł już do heresztu.
W sobotã policyjōny ze Skoczowa w czasie patrolu ul. Wiślańskij dojzdrzeli szofera we volkswagenie. Chociŏż wozidło miało zmiyniōne tabule rejestracyjne, mōndurowi podyjzdrzywali, iże może być kradziōne. Pŏrã dni wczaśnij na terynie Skoczowa z parkingu straciōł sie podobny volkswagen. Policyjōny uzdali sie wybadać auto i zweryfikować dane posiedziciela. Chop ze auta na widok radiowozu wziōn uciykać piechty. Policyjōny po krōtkim pościgu chyciyli go na wałach rzyki Wisły. 34 lata stary miyszkaniec gminy Skoczōw powodōw do ucieczki mioł pŏrã… Piyrszy z nich dowiōd, iże policyjōny mieli recht: auto, z kerego uciyk chop, to było te porwane pŏrã dni wczaśnij na terynie Skoczowa. Drugi powōd to bōł fakt, iże tabule rejestracyjne na aucie były z inkszego raubu. Do tego, po wybadaniu danych w policyjnych bazach pokŏzało sie, iże chop bōł poszukowany. W aucie były rzeczy, co snodź pochodzōm z przestympstwa. Prawiōł, iże te przedmioty nŏleżōm do niego. Jak sie niyskorzij miało pokŏzać, chop pŏrã godzin wczaśnij włōmoł sie do jednego z dōmōw na terynie krysu cieszyńskigo.
W tyn sōm dziyń, po połedniu, policyjōnōw ze Skoczowa ô włōmaniu i porwaniu poinformiyrowała 59 lŏt starŏ miyszkanka Ôgrodzōnyj. Mōndurowi w czasie zabezpieczaniŏ szlakōw i ôglōndaniŏ placu zdarzyniŏ ôbsztalowali, iże za ajnbruch ôdpowiadŏ chycōny dwie godziny wczaśnij 34-latek. Wszyjske skradzione z pōmiyszkaniŏ rzeczy w tyn sōm dziyń ôstały przekŏzane pokrziwdzōnyj. Kradziōne wozidło wrōciyło tyż do posiedziciela.
Podyjzdrzywany ô te przestympstwa chop może trefić do heresztu nawet na 10 lŏt.
Dalszŏ tajla artykułu niżyj
Zdrzōdło: KKP Cieszyn