Rybnik przed Godami
Praje miesiōnc ôstało do Godnich Świōnt – w tym czasie niy braknie we Rybniku wydarzyń, kere wkludzōm nas w tyn świōnteczny nastrōj. Bydzie jarmak, Mikołaj, animacyje, parady a kōncerty. Na binie na rynku pokożōm sie miyndzy inkszym Majka Jeżowska, Eleni i grupa ENEJ. A na fnał bydzie tradycyjno wspōlno Wilijka.
Latosi Rybnicki Gody a Kolyndowani zacznie sie już 30 listopada na rynku, kaj bydzie Godni Jarmak, a na nim 20 sztandōw ze świōntecznymi maszketami. Bydōm tyż taki atrakcyje, jak mostek powinszowań, abo chałupka dlo dzieci ze świōntecznymi animacyjami. Jarmak bydzie trwoł do 23 grudnia.
6 grudnia na tych najmyńszych czakoł bydzie Mikołaj ze swojimi elfami. Przed tym trefym bydzie jeszcze miejsko gra „ Szukōmy św. Mikołaja”.
Dalszŏ tajla artykułu niżyj
Rychtyk dużo świōntecznych atrakcyjōw bydzie we wszystki grudniowe weekendy:
- 8 grudnia bydzie szumne ôświycyni rynkowej chojinki, a przed tym pudzie bez rynek świōnteczno parada. Bydzie tyż świōnteczny fire show a kōncert ôd Majki Jeżowskiej. Dziyń niyskorzij, 9 grudnia rynek zmiyni sie we Mikołajowo Krajina Elfōw.
- 15 grudnia na rynku grać bydōm roztomańte świōnteczne mlodyje. Ku tymu muzycznymu, godnimu nastrojowi wkludzōm nas miyndzy inkzymi Piotr Tłustochowicz a Eleni.
- 22 grudnia bydzie najwiyncyj wszystkigo, a bydzie tyż przedświōnteczny finał imprezōw. Bydzie z uciechōm, ale tyż ze szmakym, a to skuli cukernie ôd Pani Mikołajowej, kero pokoże, jako sie pierniki piecze. Bydzie tyż tradycyjno wspōlno Wilijka, pospołu z kosztowaniym świōntecznego jodła. Bydzie przekozani Ôgnia Betlejymskigo, śpiywani kolyndōw a tyż kōncerty ôd zespołōw Bartnicky a ENEJ.
Ku tymu trza pedzieć, że Rybnik bydzie latoś na Świōntecznej Sztrece Ciynżarōwki ôd Coca-Cole. Te znaczne, czerwiōne auto przijedzie na rybnicki rynek 18 grudnia
Ku tymu roztomańte warsztaty ryncznych robōt, kermasze, świōntczne tyjetry, a śpiywani kolyndōw bydzie tyż we rybnickich dōmach kultury. Warsztaty roztomańtych robōt ryncznych dlo dzieci a młodziokōw bydōm we „Halo! Rybnik”
Dokładny program, co kaj, a kedy bydzie gynał na Rybnickich Godach a Kolyndowaniu znojdziecie już hned we internecu abo na plakatach.
Fotografije z łōńskygo roku: L. Tyl (UM Rybnik)
