Rybnik: Ôlimpijski maskotki na Hoymgrubie
„Od Mōnachium do Tokio” tak mianuje sie ôficjalno wystawa graczkōw – maskotōw a inkszych pamiōntkōw ôlimpijskich ze zbiorōw redachtora Hynryka Grzōnki, kero bydzie naszykowano na Zabytkowej Hoymgrubie.
Poczōntek wystawy, ze ôpowiadaniym Hynryka Grzōnki ô maskotkach a inkszych pamiōntkach ôlimpijskich, bydzie 23 kwiytnia, ô szōstej we wieczōr na Zabytkowej Hoymgrubie we Rybniku-Niewiadōmiu, przi ul.Mościckigo 3. Wystawa graczkōw – maskotkōw bydzie szło ôglōndać do 15 moja.
Na Hoymgrubie we Niewiadōmiu pokozano bydzie jedyno, najwiynkszo tako kolekcyjo we Polsce. Bydzie szło tyż podziwać sie na akredytacyje a medale za byci na ôlimpiadzie, plakaty a publikacyje ze igrzyskōw.
Piyrszo ôficjalno graczka – maskotka była naszykowano w1972 skuli XX Letnich Igrzyskōw Ôlimpijkich we Mōnachium. Ôd tego czasu maskotki sōm szykowane na kożde igrzyska.
Dalszŏ tajla artykułu niżyj
– To je jedyno tako kolekcyjo we Polsce. Tak rychtyk, to sztyjc brakuje mi jednej graczki. Bober Amik ze Mōntrealu je taki rzodki a drogi, że ciynżko je ta maskotka kupić. Roz żech już na jednym portalu jōm licytowoł, ô czym moja baba do dzisiej niy wiy, ale cyna mie przerosła – pado właściciel tej niysamowitej kolekcyje, Hynryk Grzōnka a dodowo ku tymu: jak żech już mioł praje wszystki te graczki – maskotki, to zaczōn żech zbiyrać inksze pamiōntki ôlimpijski. Ôd piyrszych igrzyskōw we Atynach wszyscy grocze na tym najwiynkszym feście szportowym dostowali na pamiōntka medale za udzioł. Niy yno grocze, ale tyż nowiniorze, działocze, dochtory, atp.Wszyscy, co byli w tej ôlimpijskij familiji. Mōm tych medalōw dwadziyścia a ône tyż bydzie szło se ôbejrzeć na wystawie, na kero piyknie zaproszōm – pado na kōniec redachtōr Grzōnka.
Piyknie zaproszōmy!
tumaczyniy: Stanisław Neblik
