Rajza po Bytōmiu szlakym nadburmistrza Georga Brüninga
„Rajza po Bytomiu” szlakym nadburmistrza Georga Brüninga ôdbydzie sie latoś w niydzielã 29 kwietnia. Piyrszŏ „Rajza po Bytomiu” bydzie poświyncōnŏ legyndarnymu nadburmistrzowi miasta Georgowi Brüningowi. W czasie trefu ôdbydzie sie m.in. wykłŏd prof. Piotra Obrączki pt. „Brüning budowniczy Bytomia” jak tyż szpacyr szlakami burmistrza. Wszyjsko zakōńczy spōlnŏ kawa w Cafe Silesia we bytōmskij Agorze. Ôrganizatorym trefu je Szlak Magnatów Przemysłowych.
Profesōr Piotr Obrączka narodziōł sie 24 września 1941r. w Bytomiu, kaj do dzisiej miyszkŏ. We familijnym mieście skōńczōł Szkołã Podstawowõ Nr 4 im. Mikołaja Kopernika jak tyż LO im. Jana Smolenia. Sztudiyrowoł na WSP w Ôpolu, kaj sie tyż dochtoryzowoł. W latach 1989-1991 bōł za lektora gŏdki polskij i kultury polskij w Instytucie Bildowaniŏ Tumaczy Uniwersytetu Wiedeńskigo. Pod jego ôpiekōm napisano było 150 prŏc magisterskich jak tyż 5 prŏc dochtorskich. Prōmowoł dochtorat ôd Adama Hanuszkiewicza. Je autorym pōnad 170 publikacyji, w tym 14 ksiōnżek. Jego zainteresowania naukowe tykajōm literatury polskij z ôkresu Modyj Polski jak tyż relacyji literackich polsko-niymieckich. Profesōr Obrączka w 2018r. dostoł tytuł Hōnorowego Ôbywatela Bytomia.
Plan trefu:
- 16.00 – wykłŏd prof. Piotra Obrączki pt.: „Brüning budowniczy Bytomia”, zal widowiskowy w Cyntrum Handlowym Agora w Bytōmiu
- 17.00 – szpacyr szlakym burmistrza po Bytōmiu
- 18.00 – kawa w Cafe Silesia
Szlak Magnatów Przemysłowych to idyjŏ na połōnczynie w jednã cołkość placōw i historyji swiōnzanych z magnatami, co grali istõ rolõ w industrializacyji Gōrnego Ślōnska. Realizacyjõ idyje zaczła seryjŏ artykułōw w Dzienniku Zachodnim.
Dalszŏ tajla artykułu niżyj
Patrōnat nad trefym trzimie Halina Bieda, radnŏ sejmiku wojewōdzkigo jak tyż Radio Piekary.
Zdrzōdło: Szlak Magnatōw Przemysłowych, fot. na wiyrchu: wila ôd Georga Brüninga w Bytōmiu. Autōr Adrian Tync, Wikimedia Commons