Radlin: sprŏwcy spraniŏ chycyni

W rynce kryminalnych z wodzisławskij kōmyndy wpadło dwōch chopōw, co w miniōnym tydniu sprali 26-latka. Sprŏwcy to ôsoby swiōnzane ze strzodowiskym pseudokibicōw. Zamaskowani chopi podjechali autŏkami na parking w Radlinie i bez powodu napadli synka, co siedzoł na ławce. Chuligani usłyszeli już ôbskarżynia i decyzyjōm prokuratury ôstali ôbjynci policyjnym dozorym. Grozi im do 3 lŏt heresztu.

Do spraniŏ doszło we strzodã przi ulicy Wieczorka w Radlinie. Po godzinie 9:00 na wieczōr na pobliski parking podjechały trzi auta, z kerych wysiedli chopi ôblyczyni w kōminiarki. Zamaskowani chuligani wziōnli lecieć w strōnã ławki, co na nij siedziało pŏrã ôsōb. Wziōnły ône uciykać w w strōnã budōnkōw miyszkalnych.

Napastnicy dogōniyli jednego z uciykajōncych na siyni. Tam bez powodu wziōnli prać chopa piyńściami po gowie i ciele. Po wszyjskim sprŏwcy wrōciyli do swojich wozideł i ôdjechali. 26-latek ôstoł ôpatrzōny w lazarycie. Skuli spraniŏ mioł rozetniyntõ brew i ôgōlnie potrzaskane ciało.

Kryminalni zarŏz wiedzieli, iże zdarzynie miało naturã chuligańskõ, a sprŏwcami były ôsoby swiōnzane ze strzodowiskym pseudokibicōw. Jeszcze tego samego dnia znŏdli dwōch z nich. Chopi ôstali zastawiyni. 19 i 25-latek z Wodzisławia usłyszeli już ôbskarżynie spraniŏ. W sobotã prokuratōr zdecydowoł ô ôddaniu chuliganōw pod dozōr policyje. Sprŏwcy majōm tyż zakŏz bliżyniŏ sie do pokrziwdzōnego. Policyjōny, co sie zajmujōm walkōm ze przestympczościōm pseudokibicōw planujōm dalsze zastawiynia.

Dalszŏ tajla artykułu niżyj

Zdrzōdło: KPP Wodzisław