Piyrszy szpil HC Oceláři Trziniec we halbfinale
Dzisiej HC Oceláři Trziniec napoczōn szpile ô awans do finału w hokeju na lodzie ô majstra ligi czeskej. Prziszło jym sie mierzić ze manszaftym HC Škoda Pilzno. Piyrszy szpil bōł w Trzińcu i sztart nie udoł sie ślōnskymu manszaftowi. Trziniec przegroł u siã aże 1-4 (0-2, 0-1, 1-1).
Tory:
0-1 Jaroslav Kracik
0-2 Milan Gulaš
0-3 Jan Kovař
1-3 Martin Růžička
1-4 Jan Kovař
Cołki dzisiejszy szpil idzie ôbejrzeć sam: https://hokej.cz/tv/hokejka/video/9605?autostart=true
Grŏ sie do 4 wygranych szpilōw, a szansa na rewanż je już we sztwŏrtek.
Dalszŏ tajla artykułu niżyj
Terminy reszty szpilōw we halbfinale:
4 kwiytnia: HC Oceláři Trziniec – HC Škoda Pilzno (ô piōntyj live we ČT Sport)
7 kwiytnia: HC Škoda Pilzno – HC Oceláři Trziniec
8 kwiytnia: HC Škoda Pilzno – HC Oceláři Trziniec (ô piōntyj live we ČT Sport)
11 kwiytnia: HC Oceláři Trziniec – HC Škoda Pilzno
13 kwiytnia: HC Škoda Pilzno – HC Oceláři Trziniec
15 kwiytnia: HC Oceláři Trziniec – HC Škoda Pilzno
We drugim halbfinale grajōm Bílí Tygři Liberec i HC Kometa Brno.
Co interesantne we halbfinale ôstały manszafty, kere we ôstatnich ôsmiu latach bōły choć rŏz majstrym ligi czeskej: HC Oceláři Trziniec (2011), HC Škoda Pilzno (2013), Bílí Tygři Liberec (2016) i HC Kometa Brno (2017 i 2018).
Foto tytułowe: screen z portalu hokejka.cz
