Nowy album ôd Chwile Nieuwagi

We piōntek, 17 marca, we Tyjatrze Rybnickij Ziymie ô siōdmyj na wieczōr ôdbōł sie kōncert kapele Chwila Nieuwagi. Wystymp bōł skuli przileżytości prymiery jejich nowego albumu „Szarok” i muzykańcio zagrali wszyske nowe kōncki, jak tyż pora starszych. Bōł żech na tym kōncercie i żech je zachwycōny. To, co Chwila Nieuwagi pokozała, to bōł piykny spektakl muzyczno-świetlno-filmowy, co go ciynżko bydzie zapōmnieć.

Na albumie je jedynoście nowych śpiywek, z tego sztyry to aranżacyje wierszōw ôd takich poetōw jak Bolesław Leśmian abo mało znano Maria Przedborska.

Niy je żech ekspert, jak sie rozchodzi ô muzyka. Ale musza pedzieć, że downo niy było tak, żeby mi sie cołki album podoboł. Wiycie, jak to je, pra? Czynsto je tak, że sie puszczōmy jakoś plata i dwie abo trzi śpiywki przeskakujymy, bo niy sōm nojlepsze. A „Szarok” sie sucho ôd poczōntku do kōńca.

Dalszŏ tajla artykułu niżyj

I niy sucho sie go tak po prostu. To je plata, co poradzi chycić za serce. Martyna Czech mo coś takigo we swojim głosie, że wyciōngo z ludzi ymocyje, co ôni ani niy wiedzieli, że je we sobie mieli. A to dziynki kōmpozytorskim talyntōm ôd Andrzeja Czecha i reszty zespołu.

Album prōmuje klip do śpiywki „Banalnie”, co go idzie niżyj posuchać, a jo blank niy rozumia, czymu ta śpiywka niy leci po trzi razy na dziyń we radiu.

Foto: Rafał Soliński