Niy ma nadzieje dlŏ ludzkości, 22.04.2018

• cyganiōne telefōny
• haker – niyhaker
• ściykliznōm w zdrowie

W tym tydniu Ameryka pokŏzała cołkimu światu, iże w gupocie idzie być światowōm awangardōm.

Amerykański ôddzioł T-Mobile zgodziōł sie zapłacić 40 milijōnōw dolarōw za to, iże używała fałszywych sygnałōw połōnczyniŏ na mobilniŏkach. Firma, jak jejich klijynt niy bōł w zasiyngu kajś na wsi, niy informowała tych, co dō niego zwōniyli, iże ta ôsoba je niydostympnŏ, ino puszczała sygnoł połōnczyniŏ, żeby zdŏwało sie, iże ôna niy ôdbiyrŏ. Dŏwało to wrażynie, iże ôperatōr niyma ôdpowiedzialny na brak zasiyngu. Wiyjske rejōny USA majōm durch problymy ze zasiyngym, tōż Federalnŏ Kōmisyjŏ Kōmunikacyje nakŏzała ôperatorōm poprawã usug na tych terynach już we 2013 roku. T-Mobile padŏ, iże fałszywe sygnały niy były na schwŏl. Toć, że niy były.

Zdrzōdło: CNN

Dalszŏ tajla artykułu niżyj

Synek z Nowyj Szkocyje w Kanadzie chcioł znojś publiczne informacyje na serwerze z dokumyntami ôd lokalnego regyrōnku. Na strōnie niy było nŏrzyńdziŏ do szukaniŏ takigo, co by mu pasowało, ale dojzdrzoł, iże dokumynta sōm normalnie numerowane, tōż napisoł jednolinijowy program, co zebroł je wszyjske. Na drugi dziyń do jego chałpy wpadli szandarzi, przeszukali cołki dōm, zabrali wszyjske kōmputry i terŏz chcōm go ôbskarżyć ô niylegalny dostymp do dokumyntōw, co sōm ôbjynte tajymnicōm. Pokŏzało sie, iże niy wszyjske dokumynta, co ôn zebroł, były publiczne. Możno trza było te tajymne zabezpieczyć, a niy ôstawiać tam, kaj publiczne?

Zdrzōdło: Boing Boing

Baba, co robi za homeopatkã we Kanadzie, lyczyła 4-letnie dziecko, co je pies bajsnōł pŏrã lŏt tymu. Bajtel bōł rojber i źle społ, tōż ôna uzdała, iże dŏ mu roztwōr ze ślinōm ôd psa ze ściykliznōm. Dziecko ściyklizny niy mŏ a my niy mōmy słōw.

Zdrzōdło: Gizmodo