Na poczōntek lata
Kōniec czyrwnia za pasym rozpoczyny sie feryje, ludziska wyjyżdżajōm na wywczasy i jak to bywo na przekōr po pandymji zaczyno sie wiela dzioć w dziedzinie kultury. Toż i u nas na slōnski ziymi miały miejsce fajery kiere dugo bydymy pamiyntać.
Po piyrsze we Gminie Świyrklany 23 czyrwnia mioło miejsce piykne wydarzyni a minowicie I Przeglōnd Zespołōw Śpiywaczych „Korali sznōr” na kieryn przijechał 5 Zespołōw niy liczōnc rodzimych “Karolinek i Paulinek.” Było to prawdziwio uczta dlo ucha i oka. Przepiykne stroje, cudowny śpiew, bo przeca kożdy s nich sie fest staroł żeby wypaś jak nojlepi. Tu trza podzinkować wszystkim uczestnikōm za kultywowani starych pieśniczek i przepiyknych ôryginalnych stroji ślōnskich spod Rybnika i Pszczyny, no i organizatorōm za piykny pōmysł kieryn mo na celu kultywowani naszej rodzimej kultury.
Drugo sprawa to „42 DNI ÔTWARTYCH DRZWI” – fajer kieryn wpisoł sie na stałe we kalyndorz fajerōw rolniczych na terynie województwa ślōnskigo przigotowany bez Ślōnski Ośrodek Doradztwa Rolniczego z Częstochowy ôddział we Mikołowie. We programie przewidziano wystawa i pokaz maszyn rolniczych, syminaria ô tymatyce rolniczej jak i wystawa drobnego inwentorza, roślin ôzdobnych, pszczelich wyrobōw i rynkodzieła. Niy ôbyło sie tyż bez wystympōw Zespołōw Ludowych i śpiywaczych. Mimo to, że niemiłosierny żar loł sie s nieba wszysjscy bawili sie doskōnale. Cały fajer two dwa dni a dzisioj przi niedzieli je jego dalszo czynś.
Muszymy tu spōmnieć jeszcze jedno ważne wydarzyni kiere miało miejsce na placu Gminnego Ośrodka Kultury i Rekreacji w Jankowicach a boł nim fajer na zakończyni plyneru rzeźbiarsko malarskigo w kierym brały udział artyści nasi i zagraniczni jak starsi tak i bajtle. Było co naprowda ôglōndać i podziwioać. Achōm i echōm niy było końca zwłaszcza, że GOKiR we Świyrklanach przigotowoł tyż wiela atrakcji dlo miyszkańcōw. Marżōnetki ,Karolinki pokozały co umiōm. Te ôstatni mimo, że cołki dziyń były w rajzie bo najpiyrw we Śmiłowicach piyknie zaśpiywały pora ślōnskich pieśniczek czym zdobyły wielki uznani publiczności. Cało ta impreza twała do nocy.
Dalszŏ tajla artykułu niżyj
We inszych pobliskich miejscowaściach tyż były rozmańte fajery na poczōntek lata. We Rybniku po niedowno głośnej „Złotej lirze” tj. Miyndzynarodowym Festiwalu Ôrkiestr Dyntych już po roz 12 roz boł „Półmaratōn Księżycowy”. Na starcie zjawiło sie kole 1000 biegaczy niy uno s Rybnika i okolic ale i s dalszych strōn. Dzisioj nad „Rybnickim Morzym „jak co roku pod kōniec czyrwnia była ôdprawiōno Mszo na wodzie, we kierej brało udział mocka rybniczan. Tym razym rzykano za żeglorzy kierzi już ôdeszli do wieczności. Jak widać s tego kożdy s nas je spragniōny takich wydarzyń i oby było jich jak najwiyncy.
Regina Sobik