Na gōrnoślōnskich szportplacach, 9.07.2020
Wczorej w lidze czeskej skōńczōły szpile ô majstra, kerym ôstała zajś Slavia Praga. We tej grupie tyż grŏ Banik Ôstrawa, kery bez wygraniŏ żodnego z 5 dodatkowych szpilōw skōńczōł na 6 placu i zajś musi rok czekać na szansa do graniŏ we Europejskich Pucharach. Ale we Ôstrawie barzij niż słabymi szpilōma w ôstatnich dniach żyli zakōńczyniym kariery ôd Milana Baroša, kery je 39 lŏt stary. Baroš, kery pochodzi ze Moraw, napoczōn syniorskŏ kariera we ślōnskim Baniku Ôstrawa. Po grze we m.in. FC Liverpool, Olympique Lyon i Galatasaray Stambul prziszoł w 2017 nazŏd do Ôstrawy, kaj mioł grać za darmo yno pŏra piesiyncy, a ôstoł przeszło 3 lata do kōńca swojej aktywnej kariery. We narodowym manszafcie Czekej Republiki zagroł 93 szpile, w kerych strzelōł 41 torōw. Nojbarzij udany bōł dlŏ niego Europejski Majsterszaft w 2004 roku, kiedy ôstoł krōlym strzelcōw.
Kariera klubowŏ ôd Milana Baroša (zdrzōdło Wikipedia)
| 1998–2001 2002–2005 2005–2007 2007–2008 2008 2008–2013 2013 2013–2014 2014–2015 2015–2016 2016–2017 2017–2020 |
 FC Baník Ostrava Liverpool FC Aston Villa FC Olympique Lyon→ Portsmouth FC Galatasaray SK FC Baník Ostrava Antalyaspor FC Baník Ostrava FK Mladá Boleslav FC Slovan Liberec FC Baník Ostrava |
76 szpile (22 tory) 68 (19) 42 (9) 24 (7) 12 (0) 93 (48) 12 (5) 13 (2) 11 (2) 21 (6) 24 (5) 59 (16) |
Skōmplikowała sie za to sytuacyjŏ we dole ligi czeskej, kaj dwa ślōnske manszafty bijōm sie, coby nie ślecieć z piyrszej ligi. Aż u 3 fusbalerōw ze Karwinej wykryty je korōnawirus i skuli tego ôdwołane sōm wszystke szpile we strefie, kerŏ grała ô utrzimaniy. Forsztand ligi na razie analizuje rōztōmaite scynariusze: abo zakōńczyć liga i żodyn manszaft nie śleci, a ze II ligi awansuje yno jedyn i na bezrok we I lidze bańdzie aże 17 manszaftōw, abo ślecōm dwa manszafty i dwa wlezōm, abo dograć do kōńca do kupy z barażōma (ale tyn scynariusz je yno mejglich, jak we nostypnym badaniu wszyscy fusbalefrzy ze Karwinej bandōm zdrowi).
Liga czeskŏ
Banik Ôstrawa – Viktoria Pilzno 0-0
FK Jablonec – Banik Ôstrawa 1-1
Dalszŏ tajla artykułu niżyj
Banik Ôstrawa skōńczōł liga na 6 placu.
Liga polskŏ
Piast Gliwice – Śląsk Wrocław 1-0
Wisła Płock – Górnik Zŏbrze 1-0
Piast Gliwice je 3, a Górnik Zŏbrze 11.
Do kōńca ôstały po 3 szpile.
Foto na wiyrchu: fcb,cz (fcb.cz) [CC BY-SA 4.0 / Wikimedia Commons]
