Na gōrnoślōnskich szportplacach, 7.08.2018
We I polskej lidze gōrnoślōnske manszafty grały do kōńca i przyniōsło to kōmplet punktōw a lidera dlŏ Piasta Gliwice.
We Gliwicach trefiyły sie dwa manszafty ze kōmpletym punktōw po dwōch rundach: Piast i dolnoślōnske Zagłymbie Lubin. Dlŏ Piasta we 23 minucie trefiōł Joel Valecia. We 33 minucie tora na 1-1 strzelōł Patryk Tuszyński. We 83 minucie na 2-1 dlŏ Piasta trefiōł Toma Hateley i Piast ôstoł liderym we I lidze polskej.
Gōrnik Zŏbrze po słabym szpilu i ôdpadniyńciu we czwŏrtek z AS Trenczyn ze kwalifikacyjōw do Ligi Europy jechoł w niedziela na Dolny Ślōnsk do Miedzi Legnica. Szpil napoczōn sie nie po myśli ôd Gōrnika, bo na 1-0 dlŏ gospodŏrzy we 27 minucie trefiōł Mateusz Piątkowski. Fusbalŏrze ze Zŏbrza dugo manczyli sie we Legnicy, ale ôstatnie 20 minut to jych popis. Nojpiyrw we 73 wyrōwnoł Dani Suarez, 4 minuty nieskorzyj na 1-2 trefiōł Igor Angulo, a we 88 minucie ôstatniego tora strzelōł Szymon Żurkowski i Gōrnik wygroł 3-1, co dało mu piōnty plac we tabuli po 3 kolejkach.
We II lidze polskej manszafty ze Gōrnego Ślōnska grały tak:
Dalszŏ tajla artykułu niżyj
GKS Jastrzymbiy – Puszcza Niepołomice 0-2
Podbeskidzie Biylsko-Biołŏ – Stomil Ôlsztyn 1-3
Ôdra Ôpole – Wigry Suwałki 2-2
GKS Katowicy – GKS Tychy 1-1
Ôdra Ôpole je 2, GKS Katowicy 6, Biylsko-Biołŏ 13, GKS Tychy 16, GKS Jastrzymbiy 17
We I lidze czeskej dwie przegrane i jednŏ wygranoł po Milan-Baroš-Show.
SFC Ôpawa grała w Pradze ze liderym ze Slavii i przegrała gładko 3-1. Nojpiyrw dwa tory strzelōł Josef Hušbauer, we 20 minucie i 51 minucie z elwra. We 80 minucie na 2-1 trefiōł Nemanja Kuzmanović, ale we ôstaniyj minucie na 3-1 strzelōł Peter Olayinka.
We drugim sobotnim szpilu Banik Ôstrawa wygroł 3-0 ze 1. FK Przibram po show ôd Milana Baroša, kery trefiōł trzi razy, we 5, 22 i 51 minucie. We Ôstrawie sie radujōm ze trzech puntkōw i z tego, iże Baroš chcioł jeszczy rok pograć we fusbal.
We ôstatnim szpilu ślōnskich manszaftōw MFK Karwina przegrała u siã 3-4 ze Mladōm Bolesław. Nojpiyrw na 1-0 trefiyli goście. We doliczōnym czasie piyrszej połowy wyrōwnoł ze elwra Lukáš Budínský. Po pauzie zajś nojpiyrw we 56 minucie trefiyli goście, a wyrōwnoł dwie minuty nieskorzyj Tomáš Wágner. We 62 minucie goście trzeci rŏz wyleźli na prowadzyniy po samobōju fusbalŏrza ze Karwinej. Mladŏ Bolesław we 83 minucie trefiyła i tor dlŏ Karwinej we 87 minucie ôd Erica Ramireza już mało pōmog.
Po trzech rundach Banik je 5, a Karwina i Ôpawa ôstatnie bez punktōw.
We II lidze czeskej Fotbal Trziniec przegroł we Usti nad Labem 1-0 i je ôstatni.
Foto na wiyrchu: fcb,cz (fcb.cz) [CC BY-SA 4.0 / Wikimedia Commons]
