Kej cołki fusbalowy świat emocjōnowoł sie finałym Ligi Majstrōw, to we lidze czeskyj grali ôstatnioł kolejka szpilōw. Mało fto wierzōł, co ze ligi nie ślejci MFK Karwina, kerŏ przegrywała ôstatnie szpile i musiała wygrać we Jihlavie z Wysoczinōm, do kerej traciōła 3 punkty. Szpil bōł fest wyrōwnany, ale we 66 minucie piyrszego tora strzelōł Jan Kalabiška. Jihlava nie chciała ôdpuścić, bo remis dŏwoł jyj utrzimaniy. We doliczōnym czasie powiōdła sie kōntra ôd Karwinej i Vladislav Lyovin ze Jihlavy musioł retować sie faulym, za co dostoł drugoł żōłtŏ kartka, a fusbalŏrze z Karwinej dostali elwra. We 94 minucie na 0-2 zamiyniōł go Tomáš Wágner. Karwina po tym szpilu skoczyła na 14 plac we tabuli, a Jihlava ślejciała 15 plac i ze ligi.

Leksze zadaniy mieli fusbalŏrze ze Ôstrawy, kerym styknōł 1 punkt, coby sie utrzimać, a grali ze ôstatniym manszaftym – Zbrojowkōm Brno. Banik wygroł 2-0 po torach ôd Dame Diopa (65 minuta) a Marka Hlinki (76 minuta) i skoczōł na 12 plac. We to we marcu chyba żodyn we Ôstrawie a cołkej lidze czeskyj nie wierzōł, bo wtedy Banik mioł 8 punktōw straty do przedôstatniego manszaftu i bukmachery dŏwali mu 5% szansy na utrzimaniy we lidze.

Milan Baroš, kery przed tym sezōnym pedzioł, co to bandzie jego ôstatni, po szpilu zmiynioł zdaniy: “Jak bandzie zdrowie, to jeszczy rok zagrōm dlŏ Banika”.

Po awansie Ôpawy (we sobota bōły ôstatnie szpile II ligi) we I lidze czeskej na bezrok bandōm aże 3 manszafty ze Ślōnska: Banik Ôstrawa, MFK Karwina i Slezsky Ôpawa. Tera czas, coby wieloś poszła w jakoś.

Dalszŏ tajla artykułu niżyj

Wyniki ôstatniej kolejki II ligi czeskej:

Fotbal Trziniec – Varnsdorf 2-2
Slezsky Ôpawa – MFK Fridek-Mistek 7-0

Slezky Ôpawa je 1 i awansowoł, Fotbal Trziniec 5, a Fridek-Mistek ôstatni i ślecioł na III ligi (liga morawsko-ślōnskŏ).

Milan Baroš – Banik Ôstrawa

(foto: fcb,cz (fcb.cz) [CC BY-SA 4.0 / Wikimedia Commons])

We Polsce grała już yno II liga, kaj bōła w niedziela przedôstatnioł kolejka. Z ligi już formalnie ślecioł Ruch Chorzōw, a żodyn manszaft ze Gōrnego Ślōska niy mioł już szans na awans.

Podbeskidzie Biylsko-Biołŏ – Wigry Suwałki 1-0
Ruch Chorzōw – Zagłymbie Sosnowiec 0-1
GKS Tychy – Ôdra Ôpole 3-0
Ôlimpia Grudziōndz – GKS Katowicy 1-1

GKS Tychy je 4, GKS Katowicy 6, Biylsko-Biołŏ 11, Ôdra Ôpole 12, Ruch Chorzōw 18.