Na gōrnoślōnskich szportplacach, 2.09.2018
We tym tydniu już nie yno ô fusbalu, ale spōmniymy tyż hokej i handbal, bo i tam dlŏ gōrnoślōnskich manszaftōw napoczły sie szpile ô punkty.
Na sztart fusbal. We piyrszej polskej lidze dwa remisy 1-1. Wiynkszy wert mŏ tyn ôd Piasta Gliwice we Poznaniu z Lechym. Nojpiyrw na 1-0 dlŏ gospodŏrzy z elwra trefiōł Christian Gytkjaer (36 minuta). Na 1-1 pod kōniec szpilu strzelōł Tōm Hatley.
We drugim szpilu Gōrnik groł u siã ze Pogōniōm Szczecin. Piyrszego tora strzelyli fusbalŏrze ze Szczecina (we 51 minucie Radosław Majewski). We 71 wyrōwnoł z elwra Igor Angulo. Na kōniec szpilu Gōrnik straciōł Michała Koja, kery dostoł czerwōnŏ kartka.
Piast je 4, Gōrnik je 10.
Dalszŏ tajla artykułu niżyj
We II lidze manszafty z Gōrnego Ślōnska grały tak:
Ôdra Ôpole – Chrobry Głogōw 3-0
Chojniczanka – GKS Katowicy 2-1
GKS Jastrzymbiy (ja, bandziymy ô nich dalyj pisać, choby jych kibice tego nie chcieli) – Bruk-Bet 4-2
GKS Tychy – Warta Poznań 1-0
Puszcza – Podbeskidzie Biylsko-Biołŏ 3-2
GKS Tychy je 6, GKS Jastrzymbiy 7, Ôdra Ôpole 9, Biylsko-Biołŏ 10, a GKS Katowicy 15.
We I lidze czeskej po tej kolejce wszystke manszafty mogōm pochwŏlić sie już wygranym szpilym. Yno fusbalŏrze Banika Ôstrawa zremisowali (0-0), ale na ciynżkim terynie we Libercu ze Slovanym.
Wygrane zaliczōły za to Slezsky Ôpawa i MFK Karwina. Slezsky Ôpawa groł ze FK Jablonec, kere bōło wysoko we tabuli. Fusbalŏrze ze Ôpawy zagrali ale nie yno walecznie (jak do tej pory w inkszych szpilach), ale tyż yntlich skutecznie. Tory strzelili Joel Kayamba (25 minuta) i David Puškač (62 minuta) i we Ôpawie mōgli sie radować ze wygranej 2-0. We drugim niedzielnym szpilu MFK Karwina grała ze 1.FC Slovacko i wygrała 2-1. Tory dlŏ Karwinej trefiyli Tomáš Wágner (64 minuta) i Adriel D’Avila Ba Loua (72 minuta). Slovacko trefiyło na 2-1 we przedôstatniej minucie, ale fusbalŏrze ze Karwinej radowali sie ze piyrszej wygranej u siã.
Banik Ôstrawa je 5, MFK Karvina 12, a Slezsky Ôpawa 14.
We hokeju napoczli ôd Europejskej Ligi Majstrōw. Mōmy w niyj dwa manszafty: GKS Tychy i Očelari Trziniec. Poczōntek bōł ale fest słaby. GKS Tychy przegroł ôba szpile u siã. We piōntek prōbowali dziebko pograć ze silniejszym HIFK Helsinki (Finlandjŏ), ale przegrali 3-5. We niedziela już nie bōło tak walecznie i Tychy przegrały u siã ze Skalleftea AIK (Szwecyjŏ) aże 1-8.
Jeszczy gorzej poszło manszaftowi ze Trzińca, kery przeca latoś na wiosna doszoł aże do pōłfinału Europejskej Ligi Majstrōw. Tera piyrsze dwa szpile grali tyż u siã i ôba gładko przegrali. We piōntek ze znanym Djurgardens IF (Szwecyjŏ) 1-6, a we niedzielã ze Tappara Tampere (Finlandjŏ) 2-8.
Ruszōła tyż polskŏ piygrszŏ liga handbala, zwanŏ Superliga. We Ôpolu Gwardiŏ miała ciynżki piyrszy szpil, bo przijechoł seryjny majster ze Kielcōw. Gwardia yno na poczōntku prōbowała gōnić handbalŏrzy PGE VIVE, ale przegrała gładko 26-36. Drugi manszaft ze Gōrnego Ślōnska, Gōrnik Zŏbrze, wygroł za to u siã ze Arkōm Gdynia aże 38-24! Byle tak dalyj.
Foto na wiyrchu i we artykule: Danixs123 [CC BY-SA 4.0 (https://creativecommons.org/licenses/by-sa/4.0)], Wikimedia Commons
