Na gōrnoślōnskich szportplacach, 18.08.2019
Ligowo durch jeszczy yno ô fusbalu, do tego ô blank słabym weekyndzie dlŏ gōrnoślōnskich manszaftōw.
Liga czeskŏ
Wszystke gōrnoślōnske manszafty we lidze czeskej przegrały swoje szpile, z tego Ôpawa i Karwinŏ u siã. We sobota Slezsky Ôpawa przegroł ze morawskim Fastavym Zlin gładko 0-3. We niedziela we Pradze jedyn z nojstarszych szpilōw we lidze czeskej: Sparta Praga – Banik Ôstrawa. Gōrōm terã bōł ale manszaft ze stolicy Rep. Czeskej, kery wygroł 2-0. Ôstani szpil to byzuch Slovana Liberec we Karwinej. Choć Slovan kōńczōł we dziewōntka, to wygroł tyn szpil 0-1.
Po 6 szpilach Banik Ôstrawa je 8, SKC Ôpawa 13, a MFK OKD Karwinŏ 16 (ôstatniŏ).
Dalszŏ tajla artykułu niżyj
Liga polskŏ
Dziebko lepiyj bōło we lidze polskej. We sobota Górnik Zŏbrze groł we Biołymstoku. Chociŏż fusbalery ze Zŏbrza kupa atakowali, to katastrofalne fejlery we ôbrōnie spowodowały, iże Jagiellonia Biołystok wygrała 3-1. We niedziela za to drugi rŏz zapunktowoł Piast Gliwice, kery wygroł u siã 1-0 ze Wisłōm Płock.
Po 5 szpilach Piast Gliwice je 5, a Górnik Zŏbrze 8.
