Na gōrnoślōnskich szportplacach, 13.05.2018
Corŏzto bliżyj kōńca sezōnu i corŏzto ciynższo sytuacyjŏ nieftorych manszaftōw ze Gōrnego Ślōnska. We polskej ekstraklasie w tym tydniu mieli my dwie kolejki szpilōw i fest skōmplikowała sie sytuacyjŏ ôd Piasta Gliwice. Fusbalŏrze z tego miasta nojpiyrw we wtorek przegrali u siã z Lechiōm Gdańsk 0-2 (tory dlŏ manszaftu ze stolicy Kaszubōw strzelyli Michał Nalepa i Joao Oliveira). We sobota nie byli lepi i przegrali we Wrocławiu ze Ślōnskym 3-1. Tory dlŏ manszaftu ze stolicy Ślōnska strzelyli Robert Piech (2) i Marcin Robak. Dlŏ Gliwic yno Saša Živec.
Piast Gliwce ślecioł na przedôstatni plac i mŏ szansa jeszczy przeskoczyć manszaft z Niecieczy, z kerym bydzie grać ôstatni szpil.
Yno dziebko lepiyj poszło manszaftowi ze Zŏbrzŏ, ale kibice Gōrnika po dobrych szpilach swojych fusbalŏrzy liczyli na wiyncej. We środa we Zŏbrzu groł nojsłabszy manszaft majstergrupy – Korōna Kielce. Kibice liczyli na trzi punkty…i sie zawiedli, bo bōł yno remis 2-2. Poczōntek bōł fest udany. Już w 1 minucie tora strzelōł Marcin Urynowicz. Potyn inicjatywa ôddali fusbalŏrzōm ze Kielc i dwa tory strzelōł Elia Soriano (21 i 28). We drugej połowie udało sie yno strzelić na remis. Tora we 58 minucie zdobōł Paweł Bochniewicz.
We niedziela mieli my klasyk polskej ligi: Legia Warszawa – Gōrnik Zŏbrze. Po dobrym poczōntku (m.in. supek ôd Angulo) to Legia ôkŏzała sie lepszŏ. Wygrali 2-0 po torach ôd Sebastiana Szymańskiego (22 minuta) i samobōju Pawłła Bochniewicza (75 minuta). Gōrnik po tym szpilu je na 5 placu.
Dalszŏ tajla artykułu niżyj
We II polskej lidze też bōły 2 kolejki i sobotnie honorowe pożegnanie z ligōm Ruchu Chorzōw, kery w derbach Gōrnego Ślōnska ôgroł GKS Katowicy. Sã wszyske wynki ze ôbu kolejek:
30)
Puszcza Niepołomice – GKS Tychy 1-2
Rakōw Czynstochowa – Ruch Chorzōw 2-1
Ôdra Ôpole – Stomil Ôlsztyn 2-4
GKS Katowicy – Podbeskidzie Biylsko-Biołŏ 3-0
31)
Ruch Chorzōw – GKS Katowicy 1-0
Podbeskidzie Biylsko-Biołŏ – Ôdra Ôpole 1-2
GKS Tychy – Rakōw Czynstochowa (pōniydziałek)
GKS Katowicy je 4, GKS Tychy 7, Ôdra Ôpole 10, Biylsko-Biołŏ 11, Ruch Chorzōw 18.
A co na połedniu Gōrnego Ślōnska? We I lidze czeskej punktuje Banik Ôstrawa, kery u siã zremisowoł ze Slovanym Liberec 1-1. Szpil zaczōn sie niepomyślnie, bo już we 21 minucie skuli kontuzyji musioł ślyź Milan Baroš. Prowadzynie dlŏ Liberca zdobōł we doliczōnym czasie piyrszej połowy (48 minuta) Oscar Dorley. Fusbalŏrze Banika doprowadziyli do remisu we 52 minucie po torze ôd Tomáša Poznara.
Juzaś nie poszło Karwinej. MFK przegrało we Jabloncu 2-1 i je na przedôstatnim placu.
Banik je 14, a MFK Karwina 15 i we nostympnej kolejce bandōm grać ze sobōm. Wyglōndoł na to, co jedyn manszaft ze Ślōnska ślejci z piyrszej ligi, a jego plac zajmie Slezky Ôpawa.
We II lidze czeskej ôdpuściōł dziebko Slezsky Ôpawa, ale ôni sōm już zicher awansu.
Dukla Praga – SFC Ôpawa 1-1
MFK Fridek-Mistek – Witkowice 2-2
Viktoria Żiżkv – Fotbal Trziniec 0-4
Slezsky Ôpawa je 1 (awans), Fotbal Trziniec 5, Fridek-Mistek 15.
Foto na wiyrchu: Jacek Tomaszewski
