Na gōrnoślōnskich szportplacach, 12.08.2018
We I polskej lidze kolejny remis Gōrnika Zŏbrze i piyrszy przegrany szpil Piasta Gliwice, i to u siã ze Legiōm z Warszawy.
Gōrnik Zŏbrze mioł szpil na Pomorzu ze Arkōm Gdynia. Fusbalŏrze z Zabrza przijechali nazŏd ze 1 punktym, choć dugo wyglōndało na to, że Gōrnik wygroł tyn szpil. Nojpiyrw we doliczōnym czasie piyrszej połowy na 1-0 dlŏ Gōrnika trefiōł Dani Suarez. We 75 minucie czerwōnŏ kartka (dwie zołte) dostoł Adrian Gryszkiewicz i Arka poczuła, co to jyj szansa na punkty. Gōrnik dobrze sie brōniōł, ale we 88 minucie tormana Gōrnika pokōnoł Michał Janota. Szpil skōńczōł sie wynikym 1-1.
We niedziela do Gliwic przijechała Legia Warszawa i moc kibicōw liczyła na kolejne trzi punkty dlŏ Gliwic, bo manszaft ze stolicy Polski ôstatnio nie je we formie. Niestety dlŏ Piasta we niedziela Legia zagrała dobry szpil i walczōła do kōńca, co skōńczyło sie przegranōm Piasta 1-3. We piyrszej połowie bōło 1-0 dlŏ Legii, a Piast straciōł po czerwōnej kartce Marcina Pietrowskiego. Po przerwie wyrōwnoł Michal Papadopulos i kibice napoczli wierzić w dobry kōniec. Legia ale grała do kōńca i strzelōła dwa tory we 86 i 95 minucie. Dlŏ Piasta to piyrszŏ przegranŏ w tym sezōnie i strata fotelu lidera.
Piast Gliwice je 2, a Gōrnik Zŏbrze je 5.
Dalszŏ tajla artykułu niżyj
We II lidze polskij yno w manszaft z Tychōw z kōmpletym punktōw:
Rakōw Czynstochowa – Ôdra Ôpole 1-0
GKS Jastrzymbiy – Chojniczanka 0-0
Podbeskidzie Biylsko-Biołŏ – Garbarnia Krakōw 0-0
GKS Tychy – Nieciecza 1-0
Sandecja – GKS Katowicy 1-0
We tabuli po cztyrych rundach Ôdra Ôpole je 4, GKS Tychy 10, Biylsko-Biołŏ 15, GKS Katowicy 16, GKS Jastrzymbiy 17.
***
W I lidze czeskej w kōncu zapunktowoł Slezsky Ôpawa. Grali u siã ze barzyj znanymy Slovanym Liberec i szpil skōńczōł sie 1-1. Nojpiyrw tora we 62 minucie strzelyli fusbalŏrze ze Liberca, ale Slezsky Ôpawa, kery we I lidze do tego szpilu bōł bez punktōw, to groł fest ambitnie, i tego szpilu nie ôdpuściōł. We 77 z elwra wyrōwnoł Nemaja Kuzmanovic i dało to piyrszy punkt Ôpawie w I lidze.
Durś bez punktu za to je MFK Karwina, kerŏ we sobota zajś gładko przegrała 4-1. Grali we Jabloncu i tora na 4-1 trefiōł dopiyro we ôstatniyj minucie Lukáš Budínský.
Banik Ôstrawa bandzie grać we pōniydziałek wieczōr we Pradze ze Bohemiansym 1905. Szpil idzie ôbejrzeć live ô 18.00 na ČT sport.
Banik Ôstrawa je 6, Slezky Ôpawa 14, a Karwina przedôstatniŏ.
We II lidze czeskej czwŏrty szpil przegroł Fotbal Trziniec. Tera 1-2 ze Pardubicōma i dalyj sōm na ôstatnim placu we tabuli.
Foto na wiyrchu: Adrian Grycuk [CC BY-SA 3.0 pl] / from Wikimedia Commons
