Kōnkurs na nojpiykniyjsze polske słowo
Polskŏ gŏdka to piyknŏ, starŏ mŏwa. Gŏdka na beztydziyń i ôd świynta, do rzykaniŏ i do ôsprawianiŏ, do dōm i do urzyndu, do chaje i do przōnio. Na dobre stała sie kōnskym naszego ślōnskigo jynzykowego landszaftu.
Skuli polskygo świynta chcymy z Wami poszukać za urodōm ôd tyj gŏdki. Znojś w nij to, co je ekstra przijymne do ślōnskigo ucha, nojbliższe naszyj regiōnalnyj wrażliwości. Chcymy pokŏzać jōm za atrakcyjnŏ, durś żywŏ i ważnŏ.
Zrychtowalimy do czytelnikōw Wachtyrza kōnkurs na nojpiykniyjsze polske słowo. Przisyłejcie ôdpowiedzi: jedne polske słōwko a krōtki kōmyntŏrz pō ślōnsku, po jakimu ône sie Wōm zdŏ piykne i ważne.
Nojfajniejsze ôdpowiedzi zbierymy i wydōmy w elektrōnicznyj publikacyji, kero bydzie dostympnŏ na naszyj zajcie. Ku tymu do 3 nojlepszych (podug nŏs) mōmy nagrody ksiōnżkowe: „Secesja Śląska – czyli Katanga” Andrzeja Burzyńskiego.
Dalszŏ tajla artykułu niżyj
Kōnkurs na nojpiykniyjsze polske słowo:
- Ôdpowiedzi przisyłejcie na: redakcyjo@wachtyrz.eu
- Termin: 30.05.2020
- Kożdy może przisłać ino jedna ôdpowiydź
- Do ôdpowiedzi trza przidać te miano abo pseudōnim, co mŏ stoć w ôgłoszyniach a publikacyji
- Przisłanie ôdpowiydzi to je zarŏz zgoda na niypłatno publikacyjo
- Nojlepsze ôdpowiedzi wybierymy w redakcyji do 3.06.2020 i dōmy ô nich znać
- Tych trzech ôsobōw, co wygrajōm ksiōnżki, spytōmy sie w emailu ô adresy
- Kōnkursowy zbiōr pokŏże sie do 6 czyrwca 2020.