Jak kejś na podium stanã – Syniawa ôdpisuje Fojermanowi

JAK KEJŚ NA PODIUM STANÃ

w ôdpowiedzi Stanisławowi Neblikowi

Rŏd mōm, jak wiersz je pisany
Rōwniuśko, rzōndek po rzōndku,
Bo już, jak żech bōł blank mały,
Uczyli mie ôjce porzōndku.

Niyrŏz, jak bajzel żech wielki
Zrobiōł, toch zebroł tyż szmary –
I durch w czowieku to siedzi,
Chociŏż już dzisioj je stary.

Sōm inksi, co majōm radzi
Porzōndek – weźcie Stanika!
Ôjce tyż czasym go prali?
Niy wiym i niy chcã w to wnikać,

Dyć jak kejś na podium stanã –
Możno niy sam, możno w niebie –
To isto dlŏ Fojermana
Zrobiã tam plac kole siebie.

 

Mirosław Syniawa – urodzony 1958 w Chorzowie, tłumacz poezji światowej na język śląski (m.in. wierszy zebranych w tomie “Dante i inksi”), autor poezji po śląsku jak i prozy pisanej w języku polskim (“Nunquam Otiosus”), współautor “Gōrnoślōnskygo ślabikŏrza”.