Gyburstag „Kornelōwki”, nowo patronka i nagrody “Łucyjki”
Jeszcze niy downo niy szło sie ani forsztelować żodnyj konferyncyji, ani inszego eventu ô Ślōnsku, kaj by jij niy było. Dowało sie na nia pozōr już z daleka, choby ino skuli piyknego ślōnskigo stroju, kery zowdy ôblykała. We godce ôd razu szło zmiarkować, co godo sie z damōm, keryj niy śmiysz niy suchać. Stuprocyntowo rechtorka staryj daty. Terozki Łucja Staniczkowo bydzie za patronki Izby Regionalnyj we Szkole Podstawowyj nr 37 we Tychach.
– Ta Izba Regionalno istnieje już od dwudziestu trzech lot, to je take magiczne miejsce, kaj wszysko sie dzieje bardzij pomału, niy tak wartko, jak kaj indzij, niy ma tego larma – pedziała nom Jolanta Michta, regionalistka. – Tukej bajtle poradzōm sie wyciszyć i znojś kontakt ze poprzednimi pokolyniami Ślōnzokōw.
To niy ma żodyn cufal, co prawie ta szkoła prziszła ku tymu, coby uhonorować Łucja Staniczkowo. Szkoła nr 37 z Oddziałami Dwujynzycznymi im. Kornela Makuszyńskigo, na kero w Tychach godajōm “Kornelōwka”, mo opinio szkoły, kaj richtiś dbajōm ô regionalno edukacyjo. Szkolorze wygrali mocka roztomajtych konkursōw, a rechtory organizujōm Wojewōdzki Konkurs Wiedzy ô Regionie “Silesia Incognita”. Terozki prawie trefiyła sie srogo przileżytość: sztyrdziesty gyburstag istniynio szkoły.
Dalszŏ tajla artykułu niżyj
– Kej piyrszy roz puścili my sam bajtle, we roku 1984, naôbkoło bōł blank inkszy świat – pedziała dyrechtorka Karina Bryja. – Sam we szkole widać, jak tyn świat sie zmiynio. Kożdy szkolorz, kery prziłazi sam z tytōm, kej pōdzie weg za ôziym lot, to dyć już do blank inkszego świata.
Nale gyburstag i nadaniy Izbie imiynio Staniczkowyj to niy były jedyne przileżytości do świyntowanio. W tyn som dziyń we “Kornelōwce” drugi roz rozdali “Łucyjki”, nagrody Zwiōnzku Gōrnoślōnskigo do uwożanych rechtorōw ôd regionalizmu. Latoś dostali je:
– we kategorii samorzōndowiec prezydynt Rudy Ślōnskij Michał Pierōńczyk,
– we kategorii rechtor akademicki profesor Joanna Rostropowicz,
– we kategorii rechtor Danuta Nawrot-Łoboziak,
– nagroda szpecjalno dr Daniela Dylus, rechtorka ze VI Licyum Ogōlnokształcōncego im. Jana Długosza we Szopiynicach.
Piykne laudacje pedzieli Anna Morajko-Fornal, prof. Zbigniew Kadłubek i dr Krystian Węgrzynek. Wele nich do Tychōw zjechało mocka inkszych zocnych gości, miyndzy nimi posłanka Urszula Koszutsko, wiceprezydynty Jarosław Makowski (Katowice) i Paweł Grosman (Tychy) abo Szymon Forajter, asystynt europosła Łukasza Kohuta.
Werci sie tyż pedzieć ô gyburstagowym programie artystycznym, kery narychtowali szkolorze i jejich rechtory. Bajtle pokludziyli nos we rajza w czasie, aże ôd roku 1984, kej szkoła piyrszy roz ôtwarła swoje dźwiyrze, szło ôboczyć ôbrozy bez nich malowane, na binie tańcowała miyndzy inkszymi wicemistrzyni Polski Alicja Jęczmyk, a koncertowała miyndzy inkszymi kapela Sound Harmony, keryj wokalistka Emilia Pułtorak robi sam za rechtorka) i tańcowoł manszaft Klaudii Zielińskij. I chocioż było modernie i dużo sie dzioło, to durś mieli my tyn gyfil, co kajsik z wiyrchu na wszysko filuje nowo patronka Izby Regionalnyj, kero zowdy godała, co juble sōm fajne, ale trza sie brać do roboty.
Tekst: Marcin Melon
Fotki: Marzena Daruil