Grupa, co żyła z prostytucyje, rozbitŏ
Ślōnscy policyjōny rozrobiyli zôrganizowanõ grupã przestympczõ, co pŏrała sie czyrpaniym piniyndzy z prostytucyje. W czasie akcyje kludzōnyj na Ślōnsku, wachtyrze prawa wkroczyli do jednego z nocnych klubōw i placōw, kaj byli czōnkowie szajki. W sumie chycōno było 6 ôsōb swiōnzanych z przestympczym procederem.
Nad sprawōm grupy fungujōncyj na terynie wojewōdztwa ślōnskigo kryminalni z Wodzisławia Ślōnskigo społym ze zespołym zwalczajōncym handel ludźmi z Kōmyndy Wojewōdzkij Policyje w Katowicach robiyli ôd pŏru miesiyncy. Śledczy sprŏwnie kōmpletowali informacyje i dowody na przestympcze fungowanie grupy, keryj czōnkowie zarŏbiali na prostytucyji. W policyjnyj akcyji swiōnzanyj z zastawiyniym czōnkōw grupy uczestniczyło bez 50 kryminalnych z Wodzisławia jak tyż Katowic, ślōnscy antyterroryści, a tyż przewodnicy z psami do ôdkrywaniŏ narkotykōw. Policyjōny wkroczyli do jednego z nocnych klubōw i pōmiyszkań ôsōb swiōnzanych z grupōm, a efektym tych działań było chycynie 4 chopōw i 2 kobiyt podyjzdrzanych ô udzioł w przestympczym procederze. Śledczy zabezpieczyli tyż postrzodki bamōncōnce jak tyż piniōndze w walucie polskij i zagranicznyj, kerŏ mogła być z przestympstw.
Dlŏ 3 czōnkōw grupy (w tym zastawiōnyj kobiyty) gyricht uzdoł ô tymczasowego heresztowaniu na 3 miesiōnce, za to w relacyji do dalszych dwōch ôsōb prokuratōr zastosowoł dozōr policyje. Wszyjscy usłyszeli ôbskarżynia czyrpaniŏ piniyndzy z niywłŏsnego niyrzōndu jak tyż udziału w zôrganizowanyj grupie przestympczyj. Grozi im do 5 lŏt heresztu.
Sprawa sie rozwijŏ, śledczy niy wykluczajōm dalszych heresztowań.
Dalszŏ tajla artykułu niżyj
Zdrzōdło i fotografijŏ: KWP Katowice