Fojerman: Na plus
2019.06.29
Na plus
Ôbejrzij sie do zadku,
Jak wartko ucieko czas,
Ôdeszli Ôjciec z Matkōm,
Na nas tyż przidzie hned czas.
Niywiela nōm ôstało,
Pora spynkanych chałp,
A ônym sztyjc je mało
I gruby stawiać chcōm zaś.
Dalszŏ tajla artykułu niżyj
Już luft mōmy zatruty,
A woda czorno sam jest,
Dyć dalij chcōm te strupy
Wōngel fedrować na fest.
We radiu sztyjc godajōm,
Że „plusy” same sōm.
Miōd płynie w cołkim kraju,
A jo nadzieja mōm,
Że „plusa” tyż dostana,
Po nocach mi sie śni,
Że pōndzie dobro zmiana,
A przidōm lepsze dni.
My sam na ni czakōmy,
Dziesiōntki dłōgich już lot.
Minusy same mōmy,
Bo kery bōł mōg, to krod.
Trza nōm ôtworzić ôczy,
Bo Ślōnsk tyż siyła mo.
Tela kożdy podskoczy,
Jako mu karta grocz do.
Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.
