Fojerman: Jo wola cep
Jo wola cep
Padajōm: „to je rzymiosło”,
A kożōm siodać do szifa,
Dyć, jak jo hyca te wiosło,
To piera nim, choćby klipa,
Jak cepym, na lewo a prawo.
Dziura zrobia we szipie.
Łōdka, bydzie dziurawo,
Utynie, abo sie kipnie.
Jo niy chca lyź do wody,
Potym mie w kościach łōmie.
Wierza, że mynij szkody
Narobia cepym we słōmie,
Dalszŏ tajla artykułu niżyj
Tōż wola wziōnś tyn cep,
A młōcić nim we snopki.
To bydzie lepszo rzecz
Dlō naszej, ślōnskij, godki.
Ziorko ôdsieja ôd plyw,
Mōnka na żarnach pomiela.
Czy bydzie z tego chlyb?
Mōm tako cicho nadzieja.
Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.
