Dykcjōnorz Godki Ślōnskij mo dwa latka

Dzisioj, 11 marca, sōm 2 lata jak Dykcjōnorz Godki Ślōnskij pokozoł sie we necu. Dwa lata, to je i mało i dużo, dlo dykcjōnorza tyż. Z jednej strōny dykcjōnorz pomału stowo na nogi, przestowo bajukać, ale z drugij strōny te kroki sōm jeszcze taki trocha niypewne, szpotawe. Dyć, najważniejsze,  że dykcjōnorz je, a idzie go znojś na www.dykcjonorz.eu. Niy yno we kōmputerach a tabulniokach, ale tyż we mobilniokach, tōż idzie go mieć dycko przi sia. Znojduje go tam co roz, to wiyncyj ludzi, co pokazuje statystyka zaglōndanio dō niego, ale tyż e-majle, a inksze wiadōmości, kere dō nos piszecie. Przeca tyn dykcjōnorz je dlo Nos Wszystkich. Wiykszość z tych uwagōw je pozytywnych, co tyż nas raduje. Pōmogo nōm to cały czas powiynkszać, uzupełniać dykcjōnorz, ale tyż poprawiać felery, kere mogōm sie tam tyż trefić.

Wiymy ô tym, że sztyjc jeszcze mało ludzi zno dykcjōnorz, tōż pora słōw ô nim a ô nos, co my go  naszykowali. Dykcjōnorz kludzi priwatnie dwōch ludzi: Stanisław Neblik „Fojerman” a Wojtek Orliński. Czym tak rychtyk je tyn dykcjōnorz? Je to słownik ślōnski we internecu on line. Treficie tam ślōnski słowa, jejich pełno ôdmiana, a tyż pokozane je, jako te słowa używać we zdaniach. Dyć niy  wszyscy znajōm jynzyk ślōnski, abo ślōnski słowa, tōż idzie na piyrszej strōnie, kaj pisze „szukaj”,wpisać jaki słowo po polsku, niymiecku, czesku, abo angelsku a dykcjōnorz pokoże Wōm te słowo po ślōnsku, abo słowa dō niego podane. Idzie wpisać”: weiss, white, bily, biały, a dycko pokoże sie „bioły”. Niy wszystki słowa sōm wpisane już we wszystkich jynzykach, ale cały czas robiymy przi tymu. Słowa ślōnski idzie tyż znojś we dykcjōnorzu w inkszy sposōb. Trza na piyrszej strōnie we dykcjōnorzu na wiyrchu wybrać: czasownik, przymiotnik, rzeczownik, imiona, liczebnik, abo inne, a potym litera A-Z a pokożōm sie wszystki słowa ze dykcjōnorza na ta litera. Tōż zaglōndejcie do dykcjōnorza, sznupejcie za ślōnskimi słowami, jejich ôdmianami, a piszcie tyż nōm, jako Wōm sie to widzi. Wiymy, że jynzyk ślōnski je roztmańty, a we inkszych strōnach ślōnska godo sie trocha inakszy, dyć na dzisiej piszymy tak, jak my poradzymy, a możno kedy przidzie ku tymu, że jynzyk ślōnski, a dykcjōnorz tyż, bydōm bardziyj „ôgōlnoślōnski”.

Na dzisiej we dykcjōnorzu je wiyncyj jak 4000 słōw, ale np. jedyn czasownik mo praje 100 ôdmianōw (czasy, osoby, rodzaje, liczby, tryby), tōż wszystkich słōw ze ôdmianami je możno hned miliōn, a ku tymu zdania, po 2-5 do kożdego słowa. Chcieli by my jeszcze przetłōmaczyć kożde zdani na polski, niymiecki, czeski, a angelski, ale na to trza czasu, ludzi, znajōmości inkszych jynzykōw. Tōż na razie je, jak je, a radujymy sie tym, co mōmy. Wos tyż zaproszōmy jeszcze roz do zaglōndanio na www.dykcjonorz.eu, a do radowanio sie z nami skuli dwōch latek naszego dykcjōnorza.

Dalszŏ tajla artykułu niżyj

Pozdrowiōmy

Stasiek Neblik

Wojtek Orliński