Aleksander Lubina: Adwentowe rzykanie #3
. . .
Pōnbōczku, Pōnbōczku,
Pōnbōczku, wy mōj
Szafnijcie do mie epne kino
ze takim wielim, wielim ekranym
czympna se na hōkrze abo na zydelku przez biletu
i byda spōziyrać na tyn wieli, wieli ekran
modry jako krzidła młodzika
co dychnōł na klopsztandze po piyrszym locie
byda spōziyrać na robotne fest
Mamusine rynce,
kiej fandzŏla i gōrki do krauzōw dowŏ
do tytek suje haferfloki i krupy
rychtuje mi sznita ze fetym,
abo lynga ze marmeladōm ize jōhanek abo podziōmkōw.
co je mōm rŏd
szafnijcie do mie epne kino
Pōnbōczku, wy mōj
ze takim wielim, wielim ekranym
na kerym Fater miechy smyczy
na bojta a do kotła
kaj ciasto geruje
co je lewōm i prawōm garściōm w pecyny kulŏ
we słōmiōnkach układŏ
do pieca na szibrze łōpaternie sadzi
spōlygliwie czekŏ na wōń czyrstwego chlyba
do sia i do cudzych
cōbych ujrzōł Mamulka
kiej we bekaryji przedōwŏ
chlyb, żymły a pleciōnki
chałki, kreple a kołŏcz
po cimŏku tyż chca ujrzeć
kiej mie oma na kole
na roraty wiezie
fazan piechty przed nami uciekŏ
a wrzeszczy a wrzeszczy
zestrachany
furg, furg
i przepŏd
szafnijcie takie kino ze pastwōm
na kerŏ wyżyna cielika
coch go krzcił na Franz Joseph
zanim go masŏrz…
takie kino ze strōmami
we kwieciu mōjōwym
furgajōncym
ze pierzyny Frau Holle
ze krzideł anielskich szkubanych
bez djŏski farōńskie
takie to niych bydzie
moje żiwobycie szczyńśliwe
we tym kinie
coście go do mie szafli
Aleksander Lubina
Górnoślązak/Oberschlesier, germanista, andragog, tłumacz przysięgły; edukator MEN, ekspert MEN, egzaminator MEN, doradca i konsultant oraz dyrektor w państwowych, samorządowych i prywatnych placówkach oświatowych; pracował w szkołach wyższych, średnich, w gimnazjach w szkołach podstawowych i przedszkolach, literat tworzący po polsku, po śląsku, po niemiecku, publicysta, współtwórca KTG Karasol.
Fotografie: Aleksander Lubina i Joanna Jakóbik