Szlakiym zabytkōw Rybnika
Rybniczek s Nacyny choć mo swoji lata
na staroś ôbejrzeć chcioł se kōnsek świata
choć miejsc do tej rajzy mioł przeca bez liku
ale jak padajōm nojlepi w Rybniku
A że żodyn mamlas ani żodno gapa
w ruksag wziōn kōmōrka GPS i mapa
siod do autobusa na placu Wolności
kaj wiela szkolorzy i rozmańtych gości
Kierōnek Niewiadōm gruba zabytkowo
widać zabudowa jakby cołkiyn nowo
miasto s autobusa wyglōndo inacy
toż sznupie na mapie kaj je ta „Ignacy”
Jest… a kōmina ni ma bo i sie niy kurzy
choć downo godali że luft nōm niy służy
że truje i szkodzi i trza nōm to zmiynić
tak przeca uznali rozmańci uczyni
A tera „Ignacy”gruba jak marzyni
zabytkiym techniki nic tego niy zmiyni
industrialne serce choć stare fest bije
toż i ludkōm wele tyż lepi sie żyje
Berkmany co czorne złoto dobywali
s starej technologie piyrsi korzistali
dzisioj dwie maszyny jeszcze sie ôstały
taki co to napynd kiejś parowy miały
Dalszŏ tajla artykułu niżyj
Ôbejrzoł Rybniczek te czary techniki
a potym ze wieży szpica Bazyliki
co jōm widać aż stōnd jak klara blicuje
i jak na tabuli na niebie maluje
Kiedy sie spamiyntoł że wrōcić je pora
do miejsca pamiynci dobrego dochtora
a bōł nim sōm Roger Juliusz mianowany
piyrwej zocny wszystkim dzisio mało znany
Kaplica lazaret w Rybniku zbudowoł
cōż kedy zōmb czasu to wszystko rujnowoł
rajcy i prezident utropa fest majōm
tōż jak yno idzie wszystko ôdnowiajom
Zmochany Rybniczek wrōciōł do Nacyny
kajś po drōdze kupiōł „Rybnicki Nowiny”
poczyto ô mieście wiela sie zmiyniło
kuknie do Grymlinej jak to downi było.
Regina Sobik, luty 2023 r.
Foto: Marcin Konsek / Wikimedia Commons / CC BY-SA 4.0