Zŏbrze: Hangranata i ewakuacyjŏ 26 ôsōb

Zŏbrscy policyjōny ewakuowali 26 ôsōb skuli znŏdniyńciŏ hangranaty F1 w parku przi ul. Sikorskigo. Saperzi z katowskigo SPAP-u zabezpieczyli znŏlezisko. Na szczyńście była to niygroźnŏ już szkorupa hangranaty bez ladōnku wybuchowego i zapalnika. Policyjōny spōminajōm, iże takigo znŏleziska niy można we żŏdnym przipadku przenosić, tykać ani rozbrajać. Zarŏz trzeba powiadōmić dinsty.

Do znŏdniyńciŏ hangranaty doszło w parku przi ulicy Sikorskigo w Zŏbrzu. Chop poszoł z bajtlym na szpacyr po parku, kaj zbiyrali kasztany. Ô swojim znŏlezisku zarŏz powiadōmiōł zŏbrskõ Policyjõ. Skuli zagrożyniŏ dlŏ miyszkańcōw ôkolicznych dōmōw policyjōny zabezpieczyli miyjsce i ewakuowali 26 ôsōb. Na plac ôstali zawołani saperzi z katowskigo SPAP-u, co zabezpieczyli, jak sie pokŏzało tym razym, niygroźne znalezisko. Była to ino szkorupa hangranaty bez materyje wybuchowyj i zapalnika.

Policyjŏ apeluje, coby nigdy niy ignorować takich ôdkryć i dycki we takich przipadkach wołać policyjõ. Niy można tyż tykać ani przenosić ich. Niy wyszyjscy ô tym pamiyntajōm.

W połowie sierpnia chop wykopoł w Katowicach 60-cyntymetrowõ patrōnã. Nojprzōd jã prōbowoł przedać na złōmie, a jak to mu sie niy podarziło, wraziōł patrōnã do auta, zawiōz nazŏd do dōm i dopiyro zazwōniōł po policyjõ.

Dalszŏ tajla artykułu niżyj

We tym samym czasie dwie kobiyty w Bytōmiu, przi skludzaniu pōmiyszkaniŏ po umartym kamracie, znŏdły patrōnã przeciwlotniczõ i zawiozły jã z bajtlym autym do bytōmskij jednostki wojskowyj.

Zdrzōdło: KMP Zŏbrze