Wiymy fto wygroł dziewiōnto edycjo “Silesia Incognita”
Amelia Macioł i Michał Rogōż – tak mianujōm sie szkolorze, kere wygrali dziewiōnto już edycyjo konkursu „Silesia Incognita”. Konkursu, ô kerym jego patrōn, europoseł Łukasz Kohut pedzioł, co to je nojbarzij rock’n’rollowy i nojbarzij ślōnski ze ślōnskich konkursōw. Jejich rechtorym je Tomasz Świdergoł, a sōm ône ze Szkoły Podstawowyj nr 27 we Katowicach-Piotrowicach. Nale latoś emocyje były richtiś sroge, styknie ino pedzieć, co we Europejskim Parlamyncie nasz hajmat bydōm reprezyntować aże dwa manszafty (a niy ino jedyn)!
Wszysko napoczło sie ôd eliminacyji, w kerych Amelia i Michał narychtowali film ô Gōrnoślōnskij Tragedyji, dziynki kerymu jury – kere kludziōł jak zowdy dochtōr Michał Dziubek – dało im piyrszy plac. Nale zarozki za niymi były Justyna Biolik i Zofia Liszka, frelki ze szkoły we Bojszowach, keryj szkolorze już roz, trzi roki nazod, wygrali “Silesia Incognita”. Piyrszo runda finału, tyż jak zowdy na Sztadionie we Tychach, to była richtiś ciynżko wyćwika do kożdego ze sztyrdziestu sześciu bajtli, kere sie tam dostali. Pytania zadowali im ekszperty z tak roztomajtych tajli żywobycio jak tradycyjne ôblyczyniy (Izolda Czmok z TVP), gyszichta (Grzegorz Kulik z Rady Jynzyka Ślōnskigo), tyjater (reżyser Mirosław Neinert), muzyka (Wojciech Kuderski z “Myslovitz” abo… MMA (Marcin Held). Coby przeńś do drugij tury trza było tyż wiydzieć co to je Rawa Blues, a co to Intel Extreme Masters, w kerym ślōnskim mieście straszōm beboki, a w kerym utopki, jak pedzieć po ślōnsku wiela je godzin, no i fto to bōł Carl Korn, a to je ino malućki kōncek. Na kōniec piyrszyj tajle finału na piyrszym miejscu durś byli Amelia z Michałym, przed Justynōm i Zosiōm.
Za to drugo tajla to już były ino same emocyje, skuli tego, co terozki szkolorze mogli brać pytania same na siebie abo ciepać w inkszych pierzym (pytania letke ino za 2 pōnkty), klōzkami (pytania za sztyry pōnkty) abo wōnglym (nojciynższe za 6 pkt.). Kej frelki z Bojszōw wziynły ôpowożnie na siebie berga wōnglo, na kero niy ôdpedziały, było klar, co wygrać poradzi ino abo manszaft ze katowickij SP 27, abo karlusy ze tyskij SP 10 – Bartosz Bartnik i Bartosz Rasztabiga. Chopcy ôdpedzieli na pora fest ciynżkich “bergōw”, kerymi ciepły w nich inksze manszafty i – tukej fest sensacyjo – to ôni wygrali drugo tura finału. Nale kej jury porachowało pōnkty ze kożdyj tajle konkursu, to lepsze ôkozali sie Amelia i Michał ze Piotrowic i to ône ôstali laureatami. Nale europoseł Kohut bōł tak rod tymu ściganiu, co pedzioł, że latoś weźnie do Bruksele ôba manszafty – i z Katowic i ze Tychōw. Trza pedzieć, co jakoś nadgroda dostoł kożdy jedyn szkolorz, kery wloz do finału, a fōndli je Fundacja Tauron i Katowicko Specjalno Strefa Ekonomiczno.
Dalszŏ tajla artykułu niżyj
Na final prziszōł tyż prezydynt Tychōw Maciej Gramatyka. I ôn i Kohut prziznali, co, kej ôni byli szkolorzami, to bajtle niy miały takij wiedzy i trocha im tego zowiszczōm. Turniej zrychtowali rechtory ze tyskij Szkoły Podstawowyj nr 37 im. Makuszyńskigo i Muzyjum Miejskie we Tychach.
Zdjyncia: Artur Pławski / MM Tychy