Uzaś mōmy Industriada

Uzaś mōmy Industriada

Ślōnsk to dziedzictwo naszych pokolyń
fabrykōw grubōw banhowōw szoli
to zimia piyrwej sadzōm zmazano
kierej starziki nasi tak przoli

Tu je historio życiym pisano
i trza nōm siły by jōm flegować
nie wszystko stare szpetotōm straszy
moge tyż czasym ôczy radować

I kwała Tymu co wziōn sie za to
niech młodzi ôbejrzom jak piyrwej było
ôstawiom auta siednōm do szole
i sjadōm na doł na gruba „Guido”

Abo se banōm kōnsek przejadōm
internet laptop ôstawiōm dōma
to nic że czasy cołkiym inaksze
ô downych pogodo starzik czy oma

Muzea browary w mig se ôbejrzōm
transport darmowy tyż zapewniōny
autobus bydzie czakoł na placu
a zresztōm ô czym my tu godōmy

Toż weź familijo i ruszej Śladym
Zabytkow Techniki kierych tak wiela
Ruda Gliwice i insze miasta
czakajōm na Cia w czyrwcowo niedziela

Regina Sobik