Truda Latuscyno – nowy kōmisorz Hanusik?

Godka ze Marcinym Melōnym:

– Twoja nowo ksiōnżka “Truda Latuscyno retuje socjalizm” już hned bydzie do kupiynio we ksiyngarniach i na zajcie wydawcy Silesia Progress. Nale fto to je ta Latuscyno? Hanusika, ô kerym żeś piyrwyj pisoł, kożdy zno, nale fto to je ta Truda?

– Truda to je ślōnsko every-woman, tako “kożdo-baba”, kero bez cufal stowo sie nojważniyjszōm perzōnōm we rozgrywkach politycznych miyndzy blokiym państw socjalistycznych a Hamerykōnami. A to jeszcze niy wszysko, bo w tle mōmy tyż planowano inwazyjo ufokōw na kula ziymsko…

– No, to żeś pojechoł…

– …i coby było jasne: Truda mo tyż czas, coby we chaupie posprzōntać, ôbiod uwarzić, wybiglować łachy swojymu chopu…

– Poczkej, poczkej! Bydymy umocniać take ôszkliwe stereotypy?

– Pamiyntej, co ksiōnżka rozgrywo sie w latach 1969-1974, wtynczos wszysko sam było trocha inksze.

– O, dobrze, żeś ô tym spōmnioł! Na ôbkłodce widzymy Fidela Castro, kery tyż gro mało rola, nale bezma wystympować tyż bydzie Jerzy Gorzelik? Je to prowda? Dyć to za wczas na Gorzelika!

– Jezderkusie, niy śmia wszyskigo pedzieć, chocioż wiysz, co przaja “Wachtyrzowi”. Nale ja, to bydzie taki “challenge”, fto znojdzie małego Jorga Gorzelika w tyj ksiōnżce.

– Niyftorzi woleliby, cobyś napisoł nastympnego Hanusika. Dyć to były epne bestsellery. Po jakymu terozki baba bydzie robić za głōwno bohatyrka?

– Jo sie śmieja, co to je moja pokuta za Hanusiki, kere sōm fest chopo-cyntryczne. Eli chca richtiś mianować sie “feministōm”, to musiołech ôddać ślōnskim frelōm sprawiedliwość. Balans musi być, pra? Nale jo żech je Trudzie richtiś rod (moja Libsta chyba niy bydzie zazdrosno) i myśla, co Czytelnik tyż bydzie.

– Tyn trocha starszy Czytelnik spōmni sie mocka rzeczy z tamtych czasōw. Byzuch Breżniewa, “Wampiyrz”, kery morduje baby, Mundial we 1974, pochody piyrszomajowe, katastrofa Spodka… Ino że niy było żodnyj katastrofy!

– Gynau, tyn Ślōnsk ze “Trudy Latuscyny…” i tyn Ślōnsk ze “Hanusikōw” to sōm trocha take alter-Ślōnski, kaj niykere rzeczy podzioły sie gynau tak samo jak na tym naszym Ślōnsku, a niykere trocha inakszyj.

– Truda je z “Ferrum Kolōnije”. Po jakymu tak? Mało fto wiy, kaj to je.

– Tyj kolōnije, kero epno Huta “Ferrum” postawiyła na Zowodziu dlo swojich huciorzy, już dzisiej niy ma, nale tam wychowała sie moja muter, tam miyszkali ōuma i ōupa. Umia sie forsztelować, co Latuski to były jejich sōmsiady. Jo za bajtla sie nasuchoł, jak fajnie sie miyszkało na Ferrum Kolōniji. Szkoda, że dzisiej ciynżko je znojś zdjyncia…

– Eli ftoś wejrzy na “Truda Latuscyno…” to zaroz do pozōr na ôbrozki.

– Ja, je tyż pora ôbrozkōw, kery narychtowoł Jacek Siegmund, fest utalyntowany ślōnski rysownik, z kerym robiymy już ôd poru lot komiksy ô Superhanysie. Niyftorzi bydōm go tyż kojarzić z cyklu “Co by pedzioł Szekspir?”.

– Czy debiut Trudy Latuscyny ôznaczo, co niy bydzie już wiyncyj ksiōnżek ô komisorzu Hanusiku?

– Tego żech niy pedzioł! Achim Hanusik mo swojich wiernych fanōw, kere czekajōm na piōnto tajla i myśla, co yntliś sie doczekajōm. Nale terozki, baby i chopy, dejcie pozōr na Truda Latuscyno!

– Dziynki!

Marcin Melon: “Truda Latuscyno retuje socjalizm”
Silesia Progress, 2023, s. 164