Świyntŏ Barbora na świecie

Podle wierzyń świyntŏ Barbora to była wczesnŏ świyntŏ krześcijańskŏ ze Baalbek we Libanie, co wtynczŏs nazywało sie Heliopolis Syryjske. Jeji miano nojwcześnij idzie znojś we siōdmym stoleciu i beztōż uznŏwanŏ je za mit. We 1969 kościōł wyciep jã ze Ôgōlnego Kalyndŏrza Rzimskigo, ale ôstawiōł jã we wykazie świyntych Kościoła Katolickigo.

Barbora patrōnuje wszyjskim, co mogōm przi robocie narŏz stracić życie: hajerōm, kopaczōm tunelōw, płatnyrzōm, rusznikŏrzōm i wszyjskim, co robiōm ze materyjami wybuchowymi.

Po hiszpańsku santabárbara, po italijańsku Santa Barbara, po starofrancusku Sainte-Barbe wszyjske ôznaczajōm magazyn prochu we fortecy abo na szifie. Kejś porzōnd trzimało sie figurã ôd świyntyj Barbory we takim magazynie.

Świyntŏ patrōnuje tōż Italijańskij Marynarce Wojynnyj, artyleryji Brytyjskij Krōlewskij Marynarki Wojynnyj, artyleryji Armije Irlandzkij inkszym tajlōm armiji na świecie.

We cyntralnyj Europie nojbarzij celebruje sie jã przi robocie w ziymi. Na bajerskich unwersytetach wydziały geologije kożdy rok ôrganizujōm Barbarafest, jak niy sztwŏrtego grudnia, to w nojbliższy piōntek. We Czeskij Republice figurã ôd świyntyj Barbory stawiŏ sie kole wchodu do prziszłego tunelu w czasie fajru zaczyńciŏ kopaniŏ.

U nŏs tradycyjnie Barborã celebrujōm bergmani. Ale to już przecã wiymy.

Foto na wiyrchu: ôłtŏrze świyntyj Barbory we szachcie Konrad i szachcie Asse II w Niymcach. Autōr: Wusel007 / Wikimedia Commons