Stanisław Neblik: Jako uczyć jynzyka ślōnskigo?

Ze wszystkich strōn słyszy sie płacz, jako to ta Warszawa je niydobro, bo niy chce nōm dać uczyć jynzyka ślōnskigo we szkole. Dyć, jo se tak myśla, wiela to pōmoże, jak już nōm sie zgodzōm uczyć tego jynzyka? A możno trza sie spytać inakszy: wiela to zaszkodzi tymu jynykowi? Możno sie sam terazki kery na mie pogorszy. Jako, zgoda na uczyni jynzyka ślōnskigo we szkołach może mu zaszkodzić? Mie sie zdo, że może, jak bydymy kogoś „zmuszać” do tego uczynio. Tōż co robić? Niy uczyć? Uczyć!!! Najlepszōm naukōm je dobry przikłod, tōż trza ludziōm, tym starszym i tym młodym, pokozać tyn dobry przikłod, coby chcieli sami sie uczyć, coby prosiyli sie ô to. Jako to zrobić? Godać – dycko a wszyndzie. Znane Ślōnzoki muszōm zacznyć godać publicznie. Cały czas je tego za mało. Idzie welōnek, wybory, godo sie ô jynzyku ślōnskim, nauczaniu regiōnalnym, ale wszystko to godo sie … po polsku. Jo rozumia, że niy kożdy poradzi godać, abo mo ta ôpowoga, coby godać po ślōnsku do cudzych ludzi, ale bez tego dobrego przikładu niy namōwiymy ludzi do godanio, ani uczynio sie po ślōnsku. Cały czas my sami robiymy za mało, comy ludzi namōwić do godanio, czytanio a pisanio po ślōnsku. Je to tak trudno zrobić strōna ŚPR po ślōnsku?  Abo chocioż te pora pōnktōw programu napisać w jynzyku ślōnskim? Padocie, że Wōm niy trza zgody ze „cyntrale”, tōż pokożcie, że godać po ślōnsku niy yno niy ma gańba, ale je to coś, czym sie mogymy chwolić. Możno wtedy niy trza bydzie ludzi „zmuszać” do uczynio sie  po ślōnsku, yno ci ludzie zmuszōm władza, coby im dała ta przileżytość do uczynio sie.

Nic, a nic

Dalszŏ tajla artykułu niżyj

Dziadku, co mówisz? – pyto sie wnuk starzika –

Wiesz, że ja tych słów nic, a nic nie chwytam.

Nic już, nic – pado starzik – tak se yno płacza.

Co by se pogodać, trza by nōm tłōmacza.

Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.