Ślōnske manszafty retuje…korōnawirus
Korōnawirus przisporzōł starości gospodarce, a przez to i szportowi. Ale korōnawirus to nie yno finansowe problymy dlŏ manszaftōw, ale tyż nie rŏz skuli przerwaniŏ szpilōw nie jedyn manszaft starciōł latoś szansa na awans. Sōm też ale dwa ślōnske manszafty, kerym korōnowirus paradoksalnie uretowoł żywobycie.
Latoś w lidze czeskej nie szło manszaftōm z Karwinej i Ôpawy. Ôd zimy durch bōły na placach, kere miały ślecieć do drugej ligi abo bić sie ô utrzimaniy we barażach. Do kōńca sezōnu ôstały jym jeszczy 3 szpile. Ale nojpiyrw liga przerwała skuli zakażyniŏ 3 fusbalŏrzy we Karwinej. Kiedy już cołki manszaft przeszoł kwarantanna, a fusbalŏrze po 2 tydniach mieli wynik negatywny, to dokōńczyniy ligi miało napoczōnć sie dzisiej. No i zajś pojawiōł sie nowy problym, bo zakażōnego fusbalŏrza zgłosiyli we Ôpawie. Skuli tego cołki manszaft musi iś na dwa tydnie do kwarantanny, a nowe szpile szłoby napoczōnć dopiyro we siyrpniu, kiedy już ôd 2.08.2020 napocznie sie nowy sezōn 2020/2021.
Skuli tego Fusbalowy Ferajn Czeskej Republiki (Fotbalová asociace České republiky) zadecydowoł, co liga je przerwanŏ i latoś nie śleci żŏdyn manszaft. Ze drugej ligi wlezōm dwa manszafty i we nowym sezōnie w piyrszej lidze bańdzie 18 manszaftōw, a we drugej yno 14. Skuli tego tyż w nowym sezōnie nie bańdzie granŏ rōnda dodatkowŏ a majster ôstanie ustalōny po 34 szpilach.
We nowym sezōnie mogymy sie radować zajś na 3 ślōnske manszafty we I czeskej lidze (Banik Ôstrawa, Slezsky FC Ôpava i MFK OKD Karwinŏ) i 1 w drugej (Fotbal Trziniec).
Dalszŏ tajla artykułu niżyj
