Siymianowice – stolica ślōnskigo horroru?

Kere ślōnske miasto przidzie wōm piyrsze do gowy, kej godka bydzie ô horrorze? Toć, Glywice majōm swoje wampiyrze wyradlōne pod DeTeeŚkōm, Tarnowske Gōry majōm posłanka Dziukowo, no i dyć na Ślōnsku mōmy tyż Frankentein. Nale styknie, co poczytocie “SI-TOWN. Uprock” i bydzie klar, co nikaj niy ma tak strasznie jak we Siymianowicach Ślōnskich.
Maciej Sojka, kerego mogecie kojarzić z hip-hopowyj kreacyji jako “Soleia” abo z heftōw “Bogowie Osiedla” wydanych bez SilesiaProgress, prawie wydoł ksiōnżka, ô kero Siymianowice mogōm ôprzić cołko swoja strategijo marketingowo. Eli niy bydōm sie boć tych pōnci, kere przijadōm ôbejrzeć motorcyklisty bez gowy abo dziura, bez kero idzie (abo ino tam mi sie zdowo?) wlyź do piekła, abo dymoniczno Azotnica, kero weźnie napranego karlusa i zasmyczy go na glajzy… Nale “SI-TOWN” to niy je ino horror, chocioż prawie tako forma wybroł Sojka na pokozaniy Hajmatu, kery ôn widzi bez filter swojij wrażliwości. Bo “SI-TOWN” cołke je spultane we ślōnskij zouzie. Choby tyn dialog:
„- Leża we totynhali, tukej na dole we kaplicy, rano mōm pogrzyb.
– Pogrzyb? A co ci sie stało?
– Założōłech na szyja pyntla i przypiōnch sie do ruły. Wtynczos tak żech pozubrowoł, że mi gowa urwało.
– Kule. Niy wiym, co pedzieć.
– Nic niy godej, ino zapol mi czasami świyczka, żebych wiedzioł kaj mōm iś w tyj ćmie.
– Dobra, Adik, zapola.
– Ino niy zapomnij.”
I ôd razu je klar, co z chopym bez gowy pōdzie godać ino po ślōnsku, bo niby po jakymu? Werci sie tyż dać pozōr na narratora, w kerym idzie znojś trocha samego Sojki, a trocha genius loci samych Siymcōw. Synka z bloku, kery do wszyskigo mo dystans. Poradzi ônaczyć sie ze satanistkōm we pyntagramie, nale tyż pomogo ksiyndzu egzorcyście. Zresztōm tyn kapelōnek to je tyż echt-Ślōnzok.
“- Pamiyntōm jak we syminarium we Katowicach chcieli zy mie zrobić Poloka. Kierownik duchowy tak mie nerwowoł, żech sie durś z nim wadziōł. A wiysz ô co? O ślōnsko godka.
– Po jakiymu?
– Tyn pierōn, że sie tak wyraża, bōł ze Wschodu, ze Kresōw i ôn niy rozumioł, że jo myśla po ślōnsku i rzykōm po ślōnsku.
– No ja, wszyndzie kaj w nazwie jes Ślōnsk, znojdzie sie jakiś chadziaj, kery wiy lepij, co my Ślōnzoki mōmy we gowie.
– Ja, eśt. To, że brewiorz czytołch po polsku, pisołch po polsku, to mu sie podobało. Ale, że jo rzykōm po ślōnsku do poduszki, to już niy.”
A co eli ftoś niy mo rod horroru a i ślōnske klimaty niy sōm do niego nojważniyjsze? Do kożdego, fto pamiynto kōńcōwka lot 90-tych i poczōntek nowego storoczo u nos, bydzie to udano rajza w czasie. A eli ftoś za bajtla czytoł komiksy ô Thorgalu, to uchichro sie, kej ôboczy Allinowe prać z batoka siymianowickich lōmpōw.
Coby niy pedzieć: “SI-TOWN” Macieja Sojki to je blank inkszo inkszość.

Marcin Melon