Przeglōnd gōrnoślōnskich szpilplacōw i lodowisk: 4.03.2018.
Tyn tydziyń to dwie kolejki w Polskej Ekstralidze fusbalowej i kans ôdwołań we Czechach.
Nojpiyrw we 25 kolejce manszafy ze Gōrnego Ślōnska grały na remisy bez torōw. Gōrnik Zŏbrze u siebie zremisowōł ze Pogōniom Szczecin, a Piast Gliwice we Arce Gdynia.
We 26 kolejce doszło do derbōw Gōrnego Ślōnska i popisu gupoty kibicōw Piasta Gliwice, kery do 80 minuty wygrywoł ze Gōrnikym Zŏbrze, po torze Mateusza Szczepaniaka ze 49 minuty. Gōrnicy prōbowali roztomaitych knifōw, ale nie mogli pokōnać tormana Gliwic. Aż do 80 minuty, kiedy to na szpilplac wtargnyli kibice Piasta Gliwice i nie dali dokōńczyć szpilu. Syndzia ôdgwizdoł kōniec i spodziywany je walkower dlŏ Zabrza.
Gōrnik je 4, a Piast 13.
Dalszŏ tajla artykułu niżyj
We Republice Czeskej kupa szpilōw we fusbal bōło ôdwołanych skuli zimna. Ôdwołano ôba szpile Banika Ôstrawa (puchar i liga), a MFK Karwina zremisowała we Slovanie Liberec 2-2, po torach ôd Tomáša Wágnera (31 minuta) i Tomáša Webera (56 minuta).
Karwina je 9, a Banik dalyj ôstatni.
Po Igrzyskach na szlynzuchy wrōcili hokeisty czeskej ekstraklasy. Nie bōł to dobry tydzień HC Oceláři Trzyniec, kere przegrało wszyjstke trzi szpile. Nojpiyrw po dogrywce ze Piráti Chomutov 2-3. Potym u siebie 2-6 ze Dynamo Pardubice, a na kōniec po dogrywce ze Mladōm Boleslav 2-3.
HC Oceláři Trzyniec sōm ale na 4 placu we tabuli i spokojnie czekajōm na play-offy.
Polskŏ Ekstraklasa je już we fazie play-off, ale ô tym napiszemy za tydziyń.
Użyta fotografia: HC Oceláři Trzyniec na wyjeździe, Pfavel Ševela [CC BY-SA 3.0 (https://creativecommons.org/licenses/by-sa/3.0)], via Wikimedia Commons
