Papuasy a Fojerman (2 – Trasa WZ, abo WSW)
Dejcie pozōr: Tekst prosty bōł pisany zarozki na laptopie, a tekst we kursywie bōł piyrwej pisany we hefcie, jak niy mioł żech przi sia laptopa, a dziepiyro potym sam wrażōny.
Trasa WZ, abo WSW
2025.05.05 godz.14:25
Trocha czasu minyło, jak żech sam ôstatnio pisoł a trocha sie pōmiyniyło, dyć jedne sie niy zmiyniyło – dalij chcymy lecieć do tyj Papui – Nowyj Gwinyje. Mōmy już paszporty, mōmy bilety, mōmy wizy do PNG, kere nōm załatwiōł br. Szymōn, mōmy chynci, coby lecieć. Niy mōmy jeszcze szczypiyniōw. Zwōniōł żech do jakigoś Instytutu Chorobōw Tropikalnych, abo jakoś tak sie to mianuje. Spytali sie mie, czy mōm szczypiyni na WZW. A co to je, te WZW? Jo znōm yno trasa WZ, abo WSW. Baba padała mi, co to bydzie stoło we jakijś ksiōnżeczce ô tym WZW. Zaczōn żech szukać, a żech znod, co we 2000 roku bōł żech szczypiōny jakimś Energixym, abo Engerixym na te WZW. Pokozało sie, co to je normalne wirusowe zapolyni wōntroby. Tōż mōgli zaroz tak godać. Kej to już mōm, tōż inksze szczypiynia zrobiōm bezmała pod kōniec moja. Z inkszych rzeczy dowiedzioł żech sie, co trza se wziōnś ze sobōm jaki cieplejsze lōnty, bo we gōrach poradzi być trocha chłōdniyj, kole 23 gradusy.
Dalszŏ tajla artykułu niżyj
2025.05.11 godz 14:20
Słōchejcie, bydymy mieć bezmała swōj fliger. Br. Szymōn kupiyli fliger ze pilotym, coby my mōgli nim lotać tam po tyj Papui bez cołki lipiec. Mōm nadzieja, co potym bydzie szło go tam ôstawić, bo przeca na Ślōnsk tego fligra niy weznymy. Niy smieści sie nōm do kofrōw. A możno dało by sie tym fligrym przilecieć nazod dudōm? Prosto do Gotartowic? Dyć auta bydōm stoły we Warszawie, tōż zaś nic z tego. A bezmała jeszcze jakiś szif trza najmnyć, coby nim popłynyć rzykōm Sepik, czy na jakoś wyspa. Mōm nadzieja, co krokodylōm taki szipy niy szmakujōm za fest.
2025.05.21. godz.8:35
Dzisiej brat Szymōn posłali nōm bilety na fliger na te loty lokalne. Tōż niy bydymy jednak mieć swojigo fligra, ale bydymy lotać jakimiś fligrami tam na miejscu. Prowda pedzieć, to wcale my tego swojigo fligra niy chcieli mieć. Styknōm bilety a plac we fligrze. Trocha sie zaczyno skłodać tyn plan: 3 lipca przilecymy ze Singapuru do Port Moresby, a na drugi dziyń, 4 lipca, polecymy bez cołko Papua na pōłnoc do Wewak. Mōmy tyż bilety na 18 lipca ze Wewak do Port Moresby i zarozki dalij ze Port Moresby do Mount Hagen, kajś we gōrach we pojstrzodku Papui – Nowyj Gwinyje. Ta Papua to musi być bogaty kraj, kej nōm tak kożōm lotać tam a nazod. Ze Mount Hagen wylecymy 24 lipca do Port Moresby, a 26 lipca wylatujymy już do Singapuru i dalij na Ślōnsk. Co bydzie miyndzy tymi lotami, to sie dowiymy wszyjscy trocha niyskorzij.
A jo sie wybiyrōm dzisiej do Wodzisławia na szczypiynie. Tam sie dowiym, na co bydōm mie szczypić. Ciekawe, czy majōm jaki szczypiōnki skuli tych ludożercōw, cobych im niy szmakowoł? Na kopruchy kupiōł żech se już taki śmiyszny hut. Jak mie zejzdrzōm te kopruchy, abo inksze krokodyle, to zarozki ucieczōm, abo popukajōm ze śmiychu.
2025.05.21 godz. 18:05
Tōż je żech już poszczypiōny a rynka mie boli. Tak sie chwolyli, co ôni tam majōm lyki na wszyjsko. Tyn dochtōr, jak zaczōn wypisować te chorōbska, co sie trza na to szczypić, to mu szkartki brakło. A jak zaczōn ôzprowiać, na co trza dować pozōr, co trza robić, czego niy robić, to żech zaczōn rozważować, czy mōm tam w ôgōle jechać. Dowiedzioł żech sie, jaki nece na kopruchy mieć, jaki pile na durchfal, jaki hut, brele. Godoł tak ze godzina, a jo żech go tak yno słōchoł, a na kōniec żech sie go spytoł, czy majōm szczypiōnka na tych ludożercōw, cobych im mynij szmakowoł. Chłop sie gupie na mie podziwoł, a padoł, co na to niy majōm lyku. Tōż już żech wszyjsko wiedzioł. Niech se chłop pogodo, kej mu za to płacōm, a jo sōm żech zdecydowoł, na co sie szczypić. Dostoł żech trzi szpryce, a za tydziyń mōm prziś jeszcze roz. Dyć do tego dochtora sie już niy wybiyrōm, chyba że mie sōm zawoło, a powiy, co już mo ta szczypiōnka skuli ludożercōw.
2025.06.08 godz. 13:20
Downo żech sam niy pisoł, bo tak prowda pedzieć niy wiym ô czym. Mōmy bilety, wizy, szczypiynia, tōż terazki czakōmy, co bydzie dalij. Martynka szykuje sie na sztudyjach na egzaminy, a jo czytōm, abo ôglōndōm filmy ô tyj Papui. Wiycie Wy, kaj to w ôgōle je ta Papua? Ludzie sie mie pytajōm, a jedyn pado, co we Afryce, inkszy, co we Australiji… Dyć Papua – Nowo Gwinyjo leży we Oceanii, kole 200 km na pōłnoc ôd Australije. Wiym, bo żech na googlach poczytoł. Głōwno tajla Papui – Nowyj Gwinyji leży na wyspie Nowo Gwinyjo, na jejij wschodniyj tajli. Zachodnio tajla wyspy Nowo Gwinyjo przinoleży do państwa Indōnezyjo. Do Papui – Nowyj Gwinyji przinoleżōm tyż roztomńte inksze myńsze wyspy, a jedna z nich – Bougainville, mo ôd 2027 roku być przed sia, jako inksze państwo. Papua – Nowo Gwinyjo tyż niy ma za dłōgo przed sia, bo dziepiyro latoś (16 września 2025) bydzie miała „Abrahama“, bydzie 50 lot, jak ôstała wolnym państwym. Piyrwej przinoleżała Papua – Nowo Gwinyjo do Niymiec, pōłnocno tajla do 1914 roku, a do Australije. Bez wojna we latach 1942-45 reskiyrowały tam Japōńczyki. Na Papui – Nowyj Gwinyji żyje kole 6,7 mln ludzi, a godajōm ôni kole 850 jynzykami. Praje kożde plymia mo swōj jynzyk, a niy dycko poradzōm sie ze sobōm dogodać. Sōm trzi jynzyki krajowe: angelski, tok pisin a hiri motu. Majōm tam kole 686 km utwardzōnych drōgōw, cugōw niy ma, za to je kole 580 lotniskōw, tōż idzie furgać fligrym, kery mo za co, pływać łōdkōm, abo chodzić piechty. Kamelōw, kōniōw, ani yjzlōw tam niy majōm, coby na nich jeździć. Płacić idzie tam kinōm (1 kina – 100 toea), ale jak weźniecie ze sobōm prosia, to tyż nim zapłacicie, bo prosiynta sōm tam dużo we wercie. Kery mo pora prosiōnt, to tyn je bogocz. Tōż tela na dzisiej, jak sie zaś czego dowiym, to Wōm dōm znać.
2025.06.16 godz.17:50
Czas leci, do rajzy ôstały dwa tydnie, a my rozważujymy, co to bydzie. Myślali my, co najgorsze bydōm te czarowniki, krokodyle a kopruchy w tyj Papui – Nowyj Gwinyji, a sam sie pokozało, co problym bydzie tam zalecieć skuli wojny Izraela ze Iranym. Sama Papua je daleko, dyć Doha leży fest blisko Iranu a rakety furgajōm tam a nazod. Cōż to bydzie? Trza rzykać a czakać…
2025.06.22 godz.23:00
Tak, jak te rakety miyndzy Izraelym a Iranym furgajōm tam a nazod, roz w jedna strōna, a roz w drugo, tak tyż te nasze, z Martynkōm, rozważowani je roz w jedna strōna, a roz w drugo, roz chcymy jechać, a roz rezygnujymy. Dyć, jak pazury styrczyły do tego Amerykōny, to Martynka padała, co ôna mo tego doś, do se pokōj, a rezygnuje. Jo jōm rozumia, niy moga jōm namowiać, coby jechała, bo sōm żech niy ma pewny, czy chca furgać miyndzy tymi bōmbami. Martynka miała już ôdmōwić swōj bilet, ale żech ji padoł, co doczkōmy jeszcze pora dni, bo jo tyż możno zrezygnuja. Kej my już tela straciyli na te bilety, wizy, szczypiynia, ubezpieczynia a inksze, to bydymy czakać do kōńca. Możno na kōniec zakożōm tym fligrōm lotać, a nōm wrōcōm za te bilety, abo nōm ich przepiszōm na inkszy roz? Kejby mi niy było żol tego Szymōna, co sie tam tela staro, coby nōm tyn byzuch tam naszykować, to bych możno już tyż tym ciepnōł, a tak sztyjc wierza, co sie możno co pōmiyni…
c.d.n.
