Ôzprawiali kole Ôlesna
Dŏwno, dŏwno tymu…
Dalszŏ tajla artykułu niżyj
Niy, tak na prŏwdy to w tym roku. Tyż ni za gōrami, a co nojwyżyj za lasami. We Szywołdzie kole Ôlesna “Stowarzyszenie Opowiadamy” narychtowało projekt, kiery mianowoł sie “Opowiadane Dziedzictwo” z programu “Działaj Lokalnie”.
Gŏdajōm, coby narōd przetrwoł – muszōm tyż trwać rōztomajtne ôpowieści z nim zwiōnzane. Tōż ku tymu zebrali sie srogsi i mniyjsi pasjonaci by ôzprawiać jak to piyrwyj bōło, przy fojerce, na rajzie na kołku, przy filmach i trefach w dōma. Potym na warsztatach nŏs uczyli jak je zôbrazŏwać – na kōmputerach i we technice linorytu. A to wszystko po to – coby wydać ksiōnżka z tymi ôpŏwieściami. Tero dziynki tymu mōmy 100 egzymplarzy – kiere majōm w sobie bery, bojki i historie, przede wszystkim po ślōnsku i pŏra po polsku – z ôbrŏzkami stworzōnymi bez ludzi na warsztatach. Dostali je zaangażowani, ale tyż kanc bibliotek (Ôlesno, Ôpole, Wrocław, Katowice i inskze) i niekierzy liderzy walki ô gŏdka i ślŏnsko kultura. Kolejne bydziymy jeszcze rozdŏwać.
Wydawnictwo to mŏ tyż płyta DVD, na kieryj znolyź idzie dwa filmy kina niezależnego. Po piyrwsze – powstały tyż z tego projektu “Konflikt Oleski” ô tzw. pŏwstaniu ôleskim – kiere bōło nieudanōm prōbōm przed tzw. pŏwstaniami ślōnskimi. To prōba gŏdanio ô ciynżkyj historyji tyj ziymi – z przedstawiyniym wszystkich ôpcji, a nie ino tyj polskiyj. Jak i ksiōnżka i film starjōm sie ôprocz pokŏzanio kultury i geszichty tyż przy ôkazji pedzieć ô tolerancyji, troski ô naszŏ mutra natura (tukej tyż uczestnicy dŏstali flaszki wielokrotnego użytku, a na trefach bōły ino srogie 3 i 5-litrowe napoje, a niy małe flaszeczki) – no i jynzyk. A jak już gŏdomy ô jynzyku – zrychtowali tyż trzeci “witacz” we Szywołdzie – po polskim “Witamy w Świerczu” i niymieckim “Wilkommen in Schönwald” je “Witōmy we Szywołdzie”.
Gŏdali my, co sōm tam dwa filmy – drugi to “Miejsce Spotkań”, kiery możecie ôbejrzeć tyż na YouTube! Je blank inkszy niż tyn ô powstaniu – dlŏ wielu niezrozumiały, ale poruszŏ tyż kwestia tolerancyji i nieuznŏwaniŏ istniynia nŏs Ślōnzokōw: https://youtu.be/4ZP1_wkUnGY
Zachyncōmy do wypożyczyniŏ we waszyj bibliotece abo do ôdbioru egzymplarzy: https://www.facebook.com/stowarzyszenieopowiadamy/
Przekŏzali my tyż do redakcji Wachtyrza egzymplarz – mōmy nadziejŏ, co tyn projekt poradzi utrzymać ôpowieści z ôkolic Ôlesna ale i rozwijać ślōnskŏ tożsamość, i ta lokalnŏ ôd wszyjskich mieszkańcōw, a i ludzie spoza ziymi ôleskiyj skorzystajōm na tym. A nojaktywniyjszym uczestnikōm w nagroda pokazujymy reszta Ślōnksa – dŏstali ksiōnżki ze wydawnictwa Silesia Progress.
