Niy ma nadziyje dlŏ ludzkości #2
- profesorka na uniwersytecie niy wiy, że Australijŏ to państwo
- dzioucha spuszczŏ hamstra w haźlu
- brytyjŏcy chcōm wyjśc z Unije, ale być w Uniji
Sztudyntka we amerykańskim stanie Idaho niy zdała symestru. Profesorka dała jij zadanie, że mŏ porōwnać USA z inkszym państwym, ôna wybrała Australijõ, tōż profesorka jij dała zero punktōw, bo podle niyj Australijŏ to je kōntynynt, a niy państwo. Po wymianie mailōw z profesorkōm, kaj sztudyntka udowŏdniała jij, że Australijŏ to je i państwo, i kōntynynt, rechtorka w kōńcu napisała, że zrobiyła niyzależne badania i uznała pracã, co jij jã sztudyntka dała. Po chaji we mydiach profesorka była wyciepniyntŏ z roboty. Na moje ôko z takōm wiedzōm ôna niy powinna była wcześnij ani tyj roboty dostać.
Inkszŏ amerykańskŏ sztudyntka prziszła na lotnisko ze hamstrym do sparciŏ ymocjōnalnego. Pracownicy linije lotniczyj pedzieli jij, iże zwierzynta niy mogōm lecieć na pokładzie tego fligra, tōż dzioucha spuściyła hamstra w haźlu, bo „niy miała inkszyj ôpcyje”. Sztudyntka chce terŏz iś do sōndu przeciwko liniji lotniczyj za ymocjōnalnõ traumã. Zamiast iś do sōndu lepij by poszła po rozum do gowy.
Dalszŏ tajla artykułu niżyj
Wielkŏ Brytanijŏ napisała notã technicznõ do państw spoza UE, coby po marcu 2019 roku, w trakcie ôkresu breksitowyj transformacyje, traktowały ich durch jak czōnka Unije. Status miyndzynŏrodowych umōw po Brexicie to je nojwiynkszy problym regyrōnku brytyjskigo, bo Wielkŏ Brytanijŏ durch bydzie musiała stosować sie do prawa unijnego, ale państwa spoza UE niy bydōm musiały dŏwać im tych samych, ekstra warunkōw, jake dŏwajōm Uniji jako całości. Barzij po brytyjsku niy idzie: chcymy Brexit, ale niy chcymy Brexitu.
