Na gōrnoślōnskich szportplacach, 22.07.2018
Napoczōn sie nowy sezōn we fusbalu. Wystartowały dwie nojwyższe ligi we Polsce i Republice Czeskej, a tam pŏra manszaftōw ze Ślōnska. Nojpiyrw musiymy ale napisać ô czwŏrtkowym szpilu Gōrnika Zŏbrze we Mołdawiji. Gōrnik groł tam rewanż ze Zariōm Balti we piyrszej rundzie kwalifikacyji do Ligi Europy. We piyrszym szpilu we Zŏbrzu bōło yno 1-0 dlŏ Gōrnika i kibice starali sie, czy to aby styknie. Szpil we Mołdawiji napoczōn sie źle, bo już we 7 minucie tora strzelyli gospodŏrze. Fusbalŏrze ze Zŏbrzŏ nie ôdpuściyli i we 85 minucie tora na 1-1 strzelōł Daniel Smuga. To stykło do awansu, kaj już we czwŏrtek czekŏ manszaft ze Słowacyji: AS Trenczin.
A tera już ligi. We piyrszej lidze polskej we niedziela fusbalŏrze ze Zŏbrzŏ yno zremisowali u siã ze Korōnōm Kielce 1-1. Na 1-0 dlŏ gospodŏrzy trefiōł zajś Daniel Smuga (46 minuta), a manszaft z Kielcōw wyrōwnoł we 62 minucie. We Zŏbrzu liczyli na wiyncej, ale po czwŏrtkowej rajzie do Mołdawiji, to na zicher nie bōł nojgorszy start w nowy sezōn.
Piast Gliwice groł we Zŏgłymbiu Sosnowiec. Prowadzynie zdobyli fusbalŏrze ze Sosnowca (36 minuta), ale nie podłōmało to Piasta i we 67 minucie ze elwra wyrōwnoł Aleksandar Sedlar. Na 10 minut do kōńca tora na 2-1 dlŏ Gliwic pod sama lata przi prawym supku trefiōł Tomasz Jodłowiec i szpil skōńczōł sie takym wynikym.
We II lidze polskej manszafty ze Ślōnska napoczły tak:
Dalszŏ tajla artykułu niżyj
Ôdra Ôpole – GKS Tychy 2-1
GKS Katowicy – Podbeskidzie Biylsko-Biołŏ 0-1
GKS Jastrzymbiy – Wigry Suwałki 1-2
We I lidze czeskej, w kerej w tym roku bandōm grać aże 3 manszafty ze Ślōnska, poczōntek tyż nie nojlpeszy. Dwa manszafty ale nie grały u siã. Yno Banik bōł za gospodŏrza i to wykorzystoł.
MFK Karwina przegroła we Libercu ze Slovanym 1-0. Tora straciyli dopiyro we 85 minucie.
Slezky Ôpawa, kery wlŏz nazŏd do I ligi po 13 latach pauzy, na start mioł ciynżki szpil we Pradze ze Spartōm. Fusbalŏrze ze Ôpawy brōniyli sie przeszło 70 minut, ale w końcu musieli uznać siōła Sparty i przegrali 0-2.
Banik Ôstrawa groł z FK Jablonec. Szpil bōł fest wyrōwnany, ale na 10 minut przed kōńcym tora na 1-0 trefiōł Milan Baroš i tak już ôstało do kōńca.
We drugej lidze czeskej w tym roku bandzie yno jedyn manszaft, kery przegroł piyrszy szpil:
Dynamo Czeske Budziejowice – Fotbal Trziniec 3-1
Foto na wiyrchu: MFK Karwina ôd Darwinek [CC BY-SA 3.0], Wikimedia Commons
