Mundial 2018 – Nazod w dōma
Dzisio dōmy pokōj auslyndrōm a pozōr dōmy na naszych. Trzech Ślōnzokōw wraco już du dōm z Mundialu i trza ofyn pedzieć – turnieju niy podbiyli. Jakby tak niy ciepli wōm sie w ôczy…
Milik – 73 min. z Synegalym
Jedne spektakularnie niydokładne podani i jedna dobro akcjo do spōły z Piszczkiym, skōńczōno szlagiym kole a wele.
Piszczek – 83 min. z Synegalym, 90 min. z Kolumbiōm
Dalszŏ tajla artykułu niżyj
Poza spōmnianōm akcjōm, w piyrszym szpilu doł sie przeciś i wyminōnć Synegalczykowi we akcji, kero skōńczyła sie samobōjym Cionka.
Glik – 10 min. z Kolumbiōm, 90 min z Japōniōm
Ekspresowo rehabilitacjo pozwolyła skrōcić rewiyr i zagrać z Kolumbiōm. Wloz kej było już po ptokach. Z Japōniōm kludzōno przez niego defynsywa bramy niy straciyła (stracić było ciynżko), ale samym wystympym w „szpilu gańby” ni ma sie co asić. Ciynżko jednak coby to Glik atakowoł Japōńczykōw na ich połowie skoro niy chciało sie ani tym z przodku.
Wszyjscy trzej walczyli latoś z kōntuzjami. Rewiyry niy wyciepły ich z turnieju, ale Mundial niy pokuloł sie tak jakby chcieli. Forgot po moimu niy pokozali sie ani lepij ani gorzij ôd reszty czelodki polskich kadrowiczōw.
To by było na tela. Chocioż… Je (a raczyj bōł) na Mundialu jeszcze 1 ślōnski akcynt. Toć, w kadrze Nimiec. Majster Świata i nojlepszy snajper w historii Mundialōw, Mirek Klose „wcisnōł” sie na swōj ulubiōny turniej po roz piōnty, tym razym robiōł za pōmagera trynera Löwa. Ni ma lekko po drugij strōnie. Pierōn biere jak modzioki w ataku „kopiōm sie po czole”, pra? Ofynsywny torman to za mało. A trza było wrazić fusbaloki do taszy…
Mirek tyż już w dōma, a turniej kulo sie dalij. Ôbadejcie pory 1/8 finału…
30.06.2018, sobota
Francjo – Argyntyna (16:00, Kazań)
Urugwaj – Portugalio (20:00, Soczi)
01.07.2018
Hiszpanio – Rusyjo (16:00, Moskwa-Łużniki)
Chorwacjo – Danio (20:00, Niżny Nowogrōd)
02.07.2018
Brazylio – Meksyk (16:00, Samara)
Belgio – Japōnio (20:00, Rostōw)
03.07.2019
Szwecjo – Szwajcario (16:00, Sankt Petersburg)
Kolumbio – Anglio (20:00, Moskwa-Otkritie)
Grzegorz Buchalik – etnolog, historyk, felietōnista, fusbalista, mody ôjciec. Kludzi bloga Ślōnski Fusbal we Dzienniku Zachodnim.
http://www.dziennikzachodni.pl/blogi/slonski-fusbal/
https://www.facebook.com/SlonskiFusbal/