Marcin Szewczyk: Czamu Ślōnzok nie śmi być prawicowcym (2)

Zeszły tydziyń szrajbłech taki prawie artikel. Dołech mu czas coby ôdpowiednio wybrzmioł, poczytołech kōmyntorze. Zapoznołech sie z tym, co mo do pedzynio na tyn tymat nasza ślōnsko „policyjo myśli”. I terozki je czas na konkluzjo.

Zaczna ôd pewnej notki geszichtowej. Wele 150 lot nazod na Ślōnsku ôdbywała sie akcyjo, kero dzisiej dziejopisy mianujōm kulturkampfym. Ugrupowaniym politycznym w Reichstagu, kere niejako broniyło Ślōnzoków przed za fest szyrokimi skutkami tej akcje była Partia Centrum. Ôni jako piyrsi mi sie zdo snochwtiyli se swoja „kōncesjo na Ślōnskość”. Jako ôna była? Mianowicie z cołkij tej agyndy wyrzinali mały kōnsek, kery chcieli ôstawić nieruszony. Była to możliwość drukowanio ksiōnżeczek do nabożyństw po polsku (sic!) i nauczanio religie w szulach też po polsku. Piyrszy roz władza ze stolice zagospodarowała se ślōnski elektorat. Jednym postulatym. Pal licho walyni w wolność wyznanio i wolność prasy, pal licho masowe powołania Ślōnzoków do wojska i posyłani na wojna francusko-prusko, pal licho propaganda szkolno wycylowano w bajtle. Ważne było, że religia była po polsku w szuli, pra?

I tak terozki zestawiōm to ze tymi ryakcjami nikierych czytelnikōw. Tymi kerzi korzōm mi sie gańbować, skłodać samokrytyka, ôdżegnujōm ôd tej „rychtyk ślōnskości”, wydowajōm gerycht ô zdrada narodowej racje, abo nawet nawołujōm do jakijś infamije. Bo jak to sie godo w mojim wyuczōnym zawodzie: „Geszichta sie nie powtarzo, nale sie rymuje”. I jo dzisiej widza fest wyraźny rym do tego co żech szrajbnył. Ślōnzoku musisz przepōmnieć wszysko! Cołko spuścina poprzednich pokolyń, kere cie kształtowały je nieważno. Ważne je, coby keryś ze stolice ciepnył ci geld na nauka ślōnskij godki w szuli (chocioż tak rychtyk, trzabyło by pedzieć że wydoł reszta z tego wszyskigo co ôstało sam zahabiōne rabunkowōm gospodarkōm a wysokimi podatkami). Mosz Hanysie zaakceptować zielōny ład, wysoki cyny bo państwo inflacjōm chce se zdewaluōwać dług kery kożdego roku rośnie, niekōntrolowano imigracja, bezmyślne finansowani inkszego państwa, indoktrynacja bajtli wbrew woli ôjców. W zamian dostaniesz trocha geldu na nauka swojij godki.

Jo robia w handlu, na codziyń żyja z targowanio sie. Ślōnzoki nawet sie nie targujōm. Nikierzi zachowujōm sie tak, choby w zamian za tyn miliard rocznie ôddali cnoty swojich cer a familia byli w sztandzie bez problymu zadłużyć na sztyry pokolynia rajn do przodku. Tam kaj jedni widzōm ale yno jedyn postulat, jo widza niemożebne koszty. Padołbych, że tym zamydlaniym ślypi Warszawa rżnie nas po prostu na kasie, yno że to mi sie zdo już ni ma zwykłe rżnyci. To je pomału analny fisting bez lubrykantu, ale zouwizou sōm Ślōnzoki, kere rade bydom ku tymu rzić wypinać, bele yno dostanōm ustawowe przizwolyni na to, coby wrażynia ôbgodać se nieskorzij po ślōnsku.

Dalszŏ tajla artykułu niżyj

Pora głosów uchyciyło sie też mojigo spōmniynio o 3K. Jako nieżyciowe i ôderwane ôd rzeczywistości. Dziwōm sie na to bez pryzmat mojigo życio, inkszych ludzi kerzi tak żyli abo durch żyjōm. Coroz szyrszego też ruchu „Tradwife”, kery nie yno skupio sie na babach, ale fungowaniu familie i społeczyństw w ôgōle. No i nie wiym czy na zicher je to taki nieżyciowe. W ôpozycji do zaradnych życiowo chopōw i bab, co umiōm trzimać chałupa i familia w kupie mōmy za to pokolyni żołnierzy w „Call of Duty” i modelek z Instagrama. Eunuchów przerażōnych bele wizytōm w kaj jakim amcie, niezdolnych do uczuć wyższych, co żyjōm tak wartko, że nawet ôdgrzoci gotowego futru w mikroweli, to je do nich za pomału.

Nie rozchodzi mi sie ale ô jakiś trzimani sie na chama tego co było. Kożdy se żyje jako chce. Nie godza sie ale na to, coby keryś mioł mi kozać gańbować sie skuli tego, skōnd sie moja tożsamość wywodzi, jako sie kształtowała, i to nie bez ôstatni 40 lot, yno bez ôstatni 140 lot i wiyncyj! Ni ma moji zgody na to, coby wspōłczesno ślōnskość miała być z tego jakoś ôberżnyto. I to samo tyczy sie dziedzictwa przemysłowego i cołkigo ślōnskigo prziwiōnzanio do niego.

Na kōniec jeszcze jedna rzecz, bo nikierym widza aż tak zaszmakowała globalistyczno elitarność, że w ferworze własnej zapiekłości zaczynajōm takich jak jo wyzywać ôd nieuków, debili etc. Hasła, że nikiere Hanysy nie chcieli sie uczyć i terozki welujōm jak welujōm blank perfekt wpisujōm sie w te cołki lewacki wyci, kerymu poświynciyłech poprzedni artikel. W nagōnka ôświycōnych babeczek co wyzywajōm publicznie 8-letnio dziołszka ôd prezidynta elekta, prof. Markowskigo co nazywo wyborców PiS debilami i darmozjadami, prof. Billewicza co zrównuje ich z mordercami Żydōw, prof. Hartmana, Środy, celebrytōw, żurnalistōw a politykōw pokroju Jandy, Olbrychskigo, Lisa, Giertycha czy Żukowskij.

I tak se myśla, że moc Ślōnzokōw dzisiej je jednak dobrze wyuczonych. Yno że trocha czynścij uczyli sie na inżynierōw, technologōw, automatykōw, programistōw, mechanikōw, chymikōw. Bo u nas tyn ôdsetek je wiynkszy niż kaj indzij w Polsce. Analogicznie, ôdpowiednio mynij je absolwyntōw takich ôświyconych kierunków jak europeistyka, dziynnikarstwo, politologia czy socjologia. Nie chca toć żodnego ôbrazić, nale mōmy przesyt na rynku pracy bezrobotnych przedstawicieli tych jakże górnolotnych kierunków. I jak widać taki przedstawiciel bardzij pragmatycznych zawodōw moge zanim ciepnie sie na gōrnolotne hasła, to zajrzy se do geldtasze, ôtworzy excela na kōmputerze i policzy tymu koszty.

Summa summarum, potwierdzo sie teza, kero ciepłech w tytule. Ślōnzok nie śmi być prawicowcym. Bo jak sie na to ôpowoży to mo raczyj ôgraniczono szansa na merytoryczno wymiana argumyntōw (toć nie całkowito), za to na zicher ôstanie wciepany do miecha z debilami, nieukami, zdrajcami etc. Kery go tam wciepie? No toć – „kōncesjōnowane Ślōnzoki jednego postulatu”.

Prawicowy Hanys

Marcin Szewczyk

Historyk, pasjonat rekonstrukcji historycznej, od wielu lat zaangażowany w działalność bractwa rycerskiego. Prezes Stowarzyszenia BASZTA promującego regionalne zabytki. Propagator używania ślōnskij godki kaj sie yno do. Autor powieści po śląsku “Silesia Noir” i “La danse macabre“, wielokrotny laureat konkursu “jednoaktówka po śląsku”.

Foto tytułowe: Tuna Ölger from Pixabay