Kulturalny październik

Kōńczy sie październik a s nim rozwiōnzanie rozmańtych fajerōw, festiwali, kōnkursōw, geburtakōw i inszych ,kierych je chyba nojwiyncy w tym miesiōncu.Toż zaczna ôd Festiwalu Kakauszali jaki mioł miejsce ôd 3 października do 8 listopada br. we Stacji Biblioteka w Rudzie Ślōnski. Festiwal Kakauszali to niy jyno Torgi Slōnski Ksiōnżki ,spotkani s pisorzami , Finał Kōnkursu Poetyckigo im ks.Norbarte Bończyka , wernisaż Piotra Pilawy ale i gala wrynczynio Tabulki ,wieczory poetycki slōnski godki a na kōniec jeszcze dochodzi geburstak Karola Goduli. Wszystki te fajery to prawdziwo uczta dlo naszych zmysłōw.

Jak już my sōm przi tym tymacie to trza spōmnieć II Festiwal slōnski Godki powiatu gliwickigo jak ôdboł sie w tym roku we Sośnicowicach .Tu uczestnicy uradowali publicznoś rozmańtymi scynkami kabaretowymi, śpiywym recytacjami a to wszystko po naszymu. Było kupa śmiychu i radości.

Do wyjōntkowych wydarzyń trza zaliczyć tyż rozmańte geburstaki Zespołōw, Kōł Gospodyń i tym podobne. Tak to 23 października jubileusz 65 -lecio istniynio miały Jankowicki Karolinki wele Rybnika .Jako ,że grupa ta działo ôd 1960 r. przewinyło sie bez nia wiela ludzi o niy dziwita bo tak sie jakoś skłodo ,że te ich śpiywki przechodzōm s starek na matki kiere kiejś działały we Kołach Gospodyń Wiejskich a tera na cery. Tak to Zespoł Karolinki powstoł s KGW, kiere i w tym roku tyż radowały sie s 80 lecio istniynio. Zespoł mo we swojim repertuarze stare ślōnski pieśniczki jak i te nowe naszkryflane bez lokalnych tworcōw .To ,że Karolinki bierōm udział w rozmańtych lokalnych i zagranicznych uroczystościach wszyjscy wiedzōm ale ,że w 2010 r. dostały za swoja działalnoś Hōnorowo Ôdznaka „Zasłużōny dlo Kultury Polski” prziznano bez Ministerstwo Kultury i Dziedzictwa Narodowego to już niy.

Trza prziznać ,że niy jyno starsi kultywujōm nasze ślōnski pieśniczki i zwyczaje ale i szkolorzi a nawet i przedszkolacy. Ci ôstatni pokozali swoj talynt na XII EDYCJI Powiatowego Kōnkursu Poezji i Prozy Patriotycznej dlo Przedszkoli w Żorach .Przipōmna jyno ,że tego typu fajery majōm miejsce już co rok ô czym przi sparciu włodarzy dbajōm Panie s Żorskigo Stowarzyszynio Edukacyjno Kulturalnego . To tela ô modych artystach s Żor a tera informacjo dlo tych starszych . Tak to jeszcze do końca października idzie posłać swoji prace do Mikołowa na kōnkurs „Napiszmy to po naszymu” a tymatym je Ślōnsko Wilijo . Natōmias we Strumiyniu za niedugo bydzie finał Kōnkursu Sztuki Nieprofesjōnalnej im. Emilii Michalskiej kierego zadaniym je twórczoś w zakresie poezji malarstwa i rynkodzieła artystycznego majce na celu kultywowani tradycje ludowej i integracji środowisk tworczych. Ważnym kōnkursym je tyż kōnkurs na kolejno edycjo „Pamiętniki kobiet z rodzin górniczych województwa śląskiego”.we kierym idzie wziońć udział do końca miesiōnca a finansowany ze środkōw Ministra Kultury i Dziedzictwa Narodowego w ramach programu dotacyjnego “Różnorodność Językowa” Instytutu Różnorodności Językowej Rzeczypospolitej. To sōm te zocniejsze kōnkursy ôrganizowane u nas na Ślōnsku ale trza tyż jeszcze zaznaczyć ,że we 2022 jak i w łōńskim roku sztyry nasze Ślōnzoczki tj. Zofia Przeliorz, Elżbieta Grymel, Regina Sobik i Ewelina Kuśka erbły nojważniejsze place we kōnkursie Jana Pocka we Lublinie. Nasze panie szkryflajōm w tym kōnkursie wiersze i proza niy yno po polsku ale i po ślōnsku a jak bydzie w tym roku to sie ôkoże. Tak dlo ciekawości dodōm jyno że p. Zofia Przeliorz we 2012r. erbła prestiżowo Nagroda im. Oskara Kolberga „Za zasługi dla kultury ludowej”, przyznowanej ôd 1974 roku osobōm za prōmowanie kultury ludowej. Sōm fajer mioł miejsce we Zamku Królewskim w Warszawie . Naszkryflałach już trocha ô naszych pisorzach a tera prziszoł dran na modych artystōw. Tak to we Chwałowicach/ dzielnica Rybnika / bydzie mioł miejsce na binie spektakl „Szkubaczki z Chwałowic”.To ôpowieś ô downych czasach kaj szkubaczki niy jyno darły piyrzi ale i rozprowiały ô downych czasach. Tera twajōm przigotowani do spektaklu kieryn bydzie mioł miejsce na prziszły miesiōnc .Trza prziznać, że tyn październik martwy jak padajōm nikierzi wcale niy je taki martwy ale pełny fajerōw , festowali i wydarzyń co świadczy dobrze i ô naszych lokalnych tworcach jak i naszej ślōnski kulturze.

Regina Sobik