Joseph von Eichendorff – SPŌMNIYNIE

230 lŏt tymu, 10 marca 1788 roku, narodziōł sie Joseph Freiherr von Eichendorff. Skuli tej ôkazyje publikujymy wiersz poety po ślōnsku we tumaczyniu ôd Mirka Syniawy. Wiersz je z tōmiku „Dante i inksi”

 

SPŌMNIYNIE

(Erinnerung)

1

Ty ptŏszku, cojś przifurgnōł sam
Z daleka, lipo, co tak sie
Kolybiesz, zdrzōdło, pedzcie mi
Kaj isto tyn mōj hajmat je.

We śniku zajś żech widzioł go,
Gōry tyż szumne tam widziołech,
A take ś nich szło pozdrowiynie
ku mie, co płaczki w ôczach miołech.

Sam, na tych cudzych wiyrchach, ludzie,
Zdrzōdła, kamiynie, strōmōw sto –
Wszyjsko to szumi pōmiyszane,
Wszyjsko sie jyno śnikym zdŏ.

2

Umiyłowane wiyrchy,
Wysoki, cichy dōm
I gōra, z keryjch patrzoł,
Jak wiosna idzie k nōm,
Matka, przŏciele, braciŏ,
Wszyjsko, co w myślach je,
W tã nockã przi miesiōnczku
Pozdrŏwiŏ juzajś mie.