Inkszo: W lesie chce sie żyć
A nojlepszyj to pońść weg do lasa, niczego nie brać ze sobōm i ô niczym niy myśleć.
Wiesław Myśliwski, “Traktat o łuskaniu fasoli”
Wiesiek dobrze godo! Jak se dychnyć, to nojlepszyj w lesie. Świyży luft, spokój, żodnych dedlajnów, szwōngu i miastowego larma… Uczyni i dochtory rozprawiajōm o tym, coby wiyncyj siedzieć przi zielōnymu. Czamu?
Ôdsztresowani i laba – szumiōnce strōmy, śpiywajōnce ptoki i zielyń – to je coś, co służy kożdymu bez wyjōntku. Rodzaj ludzki nie wywodzi sie ze szklannych biurowców ani betonowych familoków! Prziroda to naturalne środowisko człowieka, beztōż przi naturze nojlepszyj se mogymy dychnyć.
Folga do oczu – bez dziyń monitōr komputra i mobilniok, a na wieczōr telewizōr – po cołkim tydniu ślypia wołajōm o zmiyłowani. Szpacyr po lesie abo po parku to coś, czymu twōj wzrok bydzie fest rōd – wilgotny, świyży luft i zielōny kolor złagodzōm pieczyni i pomogōm w regeneracyji. Starej sie o swōj wzrok, wylyź na dwōr i dej dychnyć ôczōm.
Dalszŏ tajla artykułu niżyj
Lepszo ôdporność – powyższe do kupy skłodajōm sie na lepsze zdrowi. Jak człowiek je wypocznyty, to i ôdporność na kaj jaki niycherskości je lepszo.
Dobry humor – jak zdrowi dopisuje, to i samopoczuci lepsze. W czystwym ciele mocny duch!
Wiynkszo kreatywność – uczyni wysztaunowali, że już sztyry dni na łōnie natury poprowiajōm kreatywność i jak taki wypocznyty człowiek przidzie nazod do roboty, to wiyncyj wysztaunuje. Dotlyniōny mózg zarozki fajniście szwōnguje!
Beztōż niy czekej, żyń do lasa!
Małgorzata. Ślōnskŏ rajzowiczka spod Wodzisławia, frelka wrazidlatŏ i dociyrnŏ. Durch w gangu, rajzuje, furgŏ na paralotni, sztyjc kajś lŏce i pochŏ wiela wlezie. Przaje ślōnskij gŏdce, autōrka tekstów na Wachtyrz.eu i Inkszo.pl.
Zdjyńcia: Ania Katroshi