Inkszo: Dychnij se!
Uzaś przelecioł dziyń i nie było czasu se nic dychnyć? Jedynoście na zygarze, a jeszcze ci nie trefiyło se siednyć do porzōndku?
Prziszło nōm żyć w czasach, kaj dycki trza sie śpiychać, coby ze wszyskim zdōnżyć, je coroz mynij czasu na spani, familijo, kamratów i dbani o sia. Bo przeca ôdpoczynek to je nic inkszego, jak dbani o sia! Niy do sie sztyjc tyrać i tyrać bez straty na zdrowiu i psychice.
Wysztaunuj se, kejsik ôstatni roz nie robiōłżeś nic. Ganc nic, żodnego telewizora, fejsa, komputera. Kej ôstatni roz eś siedzioł i marzōł o niebieskich mandlach? Nie pamiyncesz? To niedobrze, bo to je do twojigo mōzgu fest ważne. I do twojigo samopoczucio tyż! Szczynśliwi ludzie to wypocznyci ludzie! Widziołżeś kiedy jakigo zeszterowanego człowieka, kerymu dycko kajś sie śpiycho, godać, że je rod ze życio?
Dalszŏ tajla artykułu niżyj
- Nojważniejszōm rzeczōm je spani. Chyba nie trza żodnymu tuplikować, jako to je, jak sie człowiek porzōndnie nie kimnie w nocy. Przi spaniu odpoczywo mózg i wszyski organy wewnytrzne, a ku tymu poprowio sie ôdporność organizmu i regyneruje sie skōra. Beztōż jak chcesz długo żyć w zdrowiu i bez zmyrszczek, dej se pozōr, coby dobrze spać. Choby te siedym godzin dziynnie!
- Ôbsztaluj se odpoczynek i konsekwyntnie trzimej sie planu. Pōł godziny na wieczōr yny na to, coby se dychnyć? Musi być i szyjn, wtynczos żodnych telefonów ani lotanio ze szmatōm po chałupie.
- Nie ôdkłodej odpoczynku na zaś. Nie yny na urlaubie noleży ci sie czas do sia, niych w pyńdziałek, wtorek czy sztwortek tyż sie znejdzie czas na wypoczynek. Twoja familijo i wszyjscy doôbkoła bydōm ci radzi, bo bydziesz spokojniejszy, ciyrpliwszy i sztabilniejszy emocjonalnie.
Bez ôdpoczynku ciynżko ô efektywność. Jak chcesz lepszyj radzić se z codziynnościōm, laba to je mus. Chcesz mieć zocne wyniki w robocie? Lepszo pamiyńć? Fajniejszo skōra i młody wyglōnd? Ôdpoczywej i porzōndnie spej. Nie podbijesz świata utropiōny i po piōntej szolce kafyju. W wypocznytym ciele mocny duch!
Małgorzata. Ślōnskŏ rajzowiczka spod Wodzisławia, frelka wrazidlatŏ i dociyrnŏ. Durch w gangu, rajzuje, furgŏ na paralotni, sztyjc kajś lŏce i pochŏ wiela wlezie. Przaje ślōnskij gŏdce, autōrka tekstów na Wachtyrz.eu i Inkszo.pl.