Gala 30-lecio „Kōnkursu Ślōnsko Godka” w żorskim MOK

23 kwiytnia br. we sali Miejskigo Ośrodka Kultury we Żorach mioł miejsce wielki fajer tj Gala 30-lecio „Kōnkursu Slōnsko Godka”. We tyn dziyń na binie krolowały ślōnski pieśniczki, prziśpiywki i rozmańte wice we wykōnaniu szkolorzy i tych troszka starszych karlusōw i frelek, a to wszystko po naszymu.

Młodzi artyści robili wszystko ,żeby pokozać sie s jak najlepszej strōny. Fest jim za to dziynkujymy i gratulujymy ôpowogi, bo co jak co, ale wystōmpić przed żorskōm publicznościōm to wielki wyzwani. To dziynki nim we te wtorkowe popołednie szło se przypōmnieć i wrocić do tych downych czasōw. Radzi my sōm ôkropnie, że te nasze szkolorze umiōm tak fajnie godać po naszymu i to tak jak kejś nasi starziki. Trza nōm jeszcze pedzieć, że niy było by tego trefu bez rechtorōw czy instruktorōw i ôjcōw bajtli ale i starzikōw, kerzy berali swojim wnukōm ô czasach swoji młodości i wszystkim.

Tym co naszkryflali rozmańte scynki i pōmogali jak umieli we tym, żeby ujrzały jak sie to godo światło dzienne. Wto jak wto, ale ci starsi ludzie, kerzy przajōm naszej godce nojlepi wiedzōm i pamiyntajōm jak to kiejś u nas było. Toż trza jich mieć we wielki zocy za to, że przekazujōm młodymu pokolyniu nasza piykno ślōnsko godka. Jak pszajōm tej godce tu we Żorach nie trza przipōminać kej taki kōnkursy twajōm już bez 30 lot a to ôgrōmny szmat czasu. Raduje tyż to, że te bajtle dorostajōm szkolōm sie, żyniōm, idōm do roboty i przekazujōm te wszystki wartości. kere nauczyli jich ich ôjcowie i starziki zaś swojim bajtlōm.

Gala 30 lot to tyż boł taki geburstag we kieryn wszyjscy co byli na tym fajerze dostali geszynk a boł nim specjalny nōmer „Bajtla”. „Bajtel” to taki cajtung s kierego idzie sie dowiedzieć ô cołki historji kōnkursōw i jich ôrganizatorōw i ô tym ,że wszystko wziyno sie ôd SP-3 i p. Gabrieli Steuer , potym przelazło bez inksze szkoły, a teroz to ciōngnie – Jadwiga Tabor ze Żorskigo Stowarzyszynio Edukacyjno Kulturalnego. Nas raduje to ,że sōm tacy ludzie kierym sie chce robić tak wiela na rzecz edukacji regiōnalnej i popularyzacje naszej godki. Na zakończyni tego trefu niy ôbeszło sie bez gratulacji, podziynkowań i kwiotkōw, kere prziniyśli przedstawiciele włodarzy miasta i pszociele slōnski godki. My ze swoji strōny dołōnczōmy sie do nich bo tyż mōmy we zocy i nasza slōnsko godka i ludzi, kerzi tak wiela robiōm dlo ni.

Dalszŏ tajla artykułu niżyj

Regina Sobik